అడ్డంగా దొరికిన కేథరిన్‌…క్లారిటీ ఇచ్చింది

స్టార్ హీరోయిన్ గా ఎదగలేకపోతున్నా.. తాను చేస్తున్న సినిమాలకు ప్రత్యేక అట్రాక్షన్‌గా మారుతోంది క్యాథరీన్ థ్రెసా. దగ్గుబాటి రానా హీరోగా నటించిన ‘నేనే రాజు నేనే మంత్రి’ సినిమాలో ఒక ప్రధాన పాత్ర చేస్తోంది కేథరిన్. అయితే ఉన్నట్టుండి కేథరిన్‌ సిగరెట్‌ తాగుతున్న ఫోటో ఒకటి బయటపడింది.

దీంతో ఫ్యాన్సంతా ఒక్కసారిగా షాక్‌ అయ్యారు. ఇక కేథరిన్‌ సిగరెట్‌ తాగుతూ అడ్డంగా దొరికిపోయిందనుకుంటే మాత్రం పప్పులో కాలేసినట్టే. ఆ ఫోటో ‘నేనే రాజు నేనే మంత్రి’  సినిమాకి సంబంధించిన ఓ స్టిల్ అని తేలింది. కేథరిన్‌ ఏంటీ…ఇలా సిగరెట్‌ తాగడమేంటని అంతా అవాక్కవుతున్న క్రమంలోనే ఆ స్టిల్స్‌ పై క్లారిటీ ఇచ్చేసింది కాథరిన్‌.

తను కేవలం పాత్ర పోషణలో భాగంగానే సిగరెట్ తాగను తప్ప.. వ్యక్తిగతంగా పొగతాగడానికి వ్యతిరేకిని అని క్యాథరీన్ చెప్పుకొచ్చింది. ఒక మహిళగా తాను సిగరెట్ తాగడాన్ని ఏ మాత్రం సమర్థించను అని స్పష్టం చేసింది. అయితే సినిమాలో తన పాత్ర కోసమే సిగరెట్ తాగాల్సి వచ్చిందని అంది. తేజ దర్శకత్వంలో రూపొందుతున్న ఆ సినిమాలో తను నెగిటివ్ కేరెక్టర్ పోషిస్తున్నాను అని క్యాథరీన్ చెప్పింది.

తను చాలా లక్కీ అని.. ఒకవైపు గ్లామర్ ను ఒలకపోస్తూనే, నటనకు ప్రాధాన్యం ఉన్న పాత్రలు దక్కుతున్నాయని.. టాలీవుడ్ తనకు అలాంటి అవకాశాలు ఇస్తోందని క్యాథరీన్ తెలిపింది. ‘గౌతమ్ నందా’లో కూడా క్యాథరీన్ ఒక హీరోయిన్ గా చేస్తోంది. ఆ సినిమా కోసం తనే స్వయంగా డబ్బింగ్ చెప్పుకున్నాను అని తెలిపింది. అంతేకాకుండా ప్రత్యేకంగా టీచర్ ను ఏర్పాటు చేసుకుని మరీ తెలుగు నేర్చుకున్నానని చెప్పుకొచ్చింది ఈ క్రేజీ బ్యూటీ.