రాజకీయాల్లోకి వస్తున్నట్టు ప్రకటించిన రజనీకాంత్ కు విలక్షణ నటుడు కమలహాసన్ అభినందనలు తెలిపారు. ‘రాజకీయాల్లోకి వస్తున్న సందర్భంగా శుభాకాంక్షలు. సమాజం పట్ల మీకున్న సెంటిమెంట్‌ అభినందనీయం. వెల్‌కం’ అని కమల్ ట్వీట్‌లో పేర్కొన్నారు.
మరోపైపు, తాను రాజకీయాల్లోకి వస్తున్నట్టు ఇప్పటికే కమల్ ప్రకటించిన సంగతి తెలిసిందే. తన పుట్టిన రోజు సందర్భంగా పార్టీని ప్రారంభిస్తానని… 2018లో పార్టీ వివరాలు ప్రకటిస్తానని ఆయన గతంలో తెలిపారు. మరోవైపు, రజనీ రాజకీయ ప్రకటనను పలువురు తమిళ సినీ ప్రముఖులు స్వాగతిస్తున్నారు. రజనీలాంటి వ్యక్తి తమిళ రాజకీయాల్లో క్రియాశీలకంగా ఉండాలని వారు అభిలషిస్తున్నారు.
అంతేకాకుండా..రజనీపై పలువురు సినీ ప్రముఖులు అభినందనలు కురిపిస్తున్నారు. ‘రజనీ అద్భుతమైన వ్యక్తి. నా సహచర నటుడు, ఆప్తుడు అయిన రజనీ రాజకీయాల్లోకి వస్తున్నట్టు ప్రకటించాడు. రాజకీయాల్లో అతను రాణించాలని మనస్ఫూర్తిగా కోరుకుంటున్నా’ అంటూ అమితాబ్ బచ్చన్ ట్వీట్ చేశారు.
