అనుష్క టైటిల్‌ రోల్‌లో నటించిన చిత్రం ‘భాగమతి’. ఉన్ని ముకుందన్‌, జయరాం తదితరులు కీలక పాత్రలు పోషించారు. జి.అశోక్‌ దర్శకుడు. యువీ క్రియేషన్స్‌ బ్యానర్‌పై వంశీ, ప్రమోద్‌, విక్కీ నిర్మిస్తున్నారు. తమన్‌ స్వరాలు సమకూరుస్తున్నారు. ఈ చిత్రం ప్రీ రిలీజ్‌ కార్యక్రమం హైదరాబాద్‌లో ఘనంగా జరిగింది. ఈ సందర్భంగా అనుష్క మాట్లాడుతూ.. ‘‘ఈ అవకాశం ఇచ్చిన యువీ క్రియేషన్స్‌ నిర్మాతలకు ధన్యవాదాలు చెప్పాలి.
2012లో ‘భాగమతి’ కథ విన్నా. కానీ, డేట్స్‌ లేక ఇంతకాలం ఆగాల్సి వచ్చింది. నా కోసం ఇన్నాళ్లు ఆగారు. నేను కాకుండా ఇంకెవరైనా ఈ సినిమా చేసి ఉంటే మంచి అవకాశం కోల్పోయినందుకు చాలా బాధపడేదాన్ని. అంతలా నా హృదయానికి దగ్గరైంది. ఇది కేవలం అనుష్క సినిమా మాత్రమే కాదు. చాలా మంది ఇందులో నటించారు. ప్రతీ ఒక్కరిదీ ముఖ్యమైన పాత్ర. నా గత చిత్రాలకు లాగానే ఇది కూడా మిమ్మల్ని అలరిస్తుందని ఆశిస్తున్నా’’ అని అన్నారు.
ఈ మూవీ జనవరి 26న ప్రేక్షకుల ముందుకు రానుంది. తెలుగుతో పాటు తమిళం, మలయాళ భాషల్లోనూ ఈ సినిమాను విడుదల చేస్తున్నారు. ఈ చిత్రంలో ఆది పినిశెట్టి మరోసారి ప్రతినాయక పాత్రలో అలరించనున్నాడు.
