బిగ్ ప్రాజెక్టు బాహుబలి తర్వాత టాలీవుడ్ హీరోయిన్ అనుష్క లీడ్ రోల్‌లో నటించిన మూవీ భాగమతి. అనుష్క నటన, దర్శకుడు అశోక్ టేకింగ్, మథి కెమెరా వర్క్, తమన్ రీ రికార్డింగ్, హై స్టాండర్డ్స్‌‌లో ఉన్న నిర్మాణాత్మక విలువలు, అబ్బుర పరిచే రవీందర్ ఆర్ట్ వర్క్‌తో ప్రేక్షకులు భారీ అంచనాల నడుమ విడుదలైన ‘భాగమతి’ బాక్సాఫీస్ వద్ద కలెక్షన్ల వర్షం కురిపిస్తోంది. భాగమతి అమెరికాలో తనదైన వసూళ్లను రాబడుతూ సక్సెస్‌ఫుల్‌గా ప్రదర్శించబడుతున్నట్లు సినీ విశ్లేషకులు వెల్లడించారు.
రిపబ్లిక్ డే సందర్భంగా ప్రేక్షకుల ముందుకు వచ్చిన ఈ మూవీ ప్రీమియర్ షోలు, తొలి రెండు రోజులు (శుక్ర, శనివారాలు) కలిపి 542 వేల డాలర్లు (రూ.3.52 కోట్లు) వసూలు చేసినట్లు తెలిపారు. టాప్ హీరోల సినిమాలకు ధీటుగా భాగమతి కలెక్షన్లను వసూలు చేస్తున్నట్లు డైరెక్టర్ అశోక్ వెల్లడించారు. తొలి రోజు కన్నా థియేటర్ల సంఖ్య పెరిగినట్లు తెలిపారు. రికార్డు వసూళ్లు రాబట్టి దక్షిణాదిలో మహిళ ప్రాధాన్యమున్న చిత్రాల్లో అత్యధిక ఆరంభ వసూళ్లు సాధించిన చిత్రంగా నిలిచింది. ఈ సినిమాకు మున్ముందు కలెక్షన్లు మరింత పెరుగుతాయని భావిస్తున్నారు. తమ సినిమాకు వస్తున్న స్పందన పట్ల ‘భాగమతి’ చిత్ర యూనిట్‌ సంతోషం వ్యక్తం చేసింది.
