సినీనటుడు, ఎమ్మెల్యే బాలకృష్ణ కొత్త అవతారం ఎత్తనున్నాడు. ఇప్పటివరకు హీరోగా క్లాస్,మాస్,పౌరాణిక చిత్రాల్లో నటించిన బాలయ్య…పైసా వసూల్‌తో సింగర్‌గా కూడా మారాడు. ఇక త్వరలో బాలయ్య నిర్మాతగా కూడా మారనున్నాడు. గౌతమిపుత్ర శాతకర్ణితో వంద చిత్రాల మైలురాయిని అందుకున్న బాలకృష్ణ…ప్రస్తుతం కేఎస్‌ రవికుమార్‌తో 102వ సినిమా చేస్తున్నాడు.
ఈ సినిమా తర్వాత ఎన్టీఆర్ బయోపిక్‌ని తెరకెక్కించబోతున్నట్టు ప్రకటించారు. స్క్రిప్టు ఇప్పటికే సిద్ధమైనట్టు సమాచారం. కొంత కాలంగా సరైన దర్శకుడి కోసం అన్వేషిస్తున్నారు. ఆ ప్రయత్నాలు ఓ కొలిక్కి వచ్చినట్టు తెలుస్తోంది. ఇప్పుడు ఈ చిత్రాన్ని తన సొంత నిర్మాణ సంస్థలోనే తెరకెక్కించాలని భావిస్తున్నారట.
ఫిలింనగర్ లేటెస్ట్ అప్‌డేట్స్ ప్రకారం బ్రహ్మతేజ ప్రొడక్షన్స్ పేరిట ఓ చిత్ర నిర్మాణ సంస్థను నెలకొల్పేందుకు బాలకృష్ణ ప్లాన్ చేస్తున్నట్టు సమాచారం. పెద్ద కూతురు బ్రాహ్మణి, చిన్న కూతురు తేజస్విని పేర్లు రెండూ కలిసొచ్చేలా తన సినిమా బ్యానర్‌కి పేరు పెట్టాలని బాలయ్య బాబు భావిస్తున్నట్టు ఫిలిం నగర్ టాక్. ఈ బ్యానర్‌పై నిర్మించబోయే తొలి సినిమాలో మోక్షజ్ఞ ఎంట్రీ కూడా ఉండనున్నట్లు తెలుస్తోంది.
