ఘనంగా బక్రీద్ వేడుకలు…

238
Bakrid Festival Celebrations

దేశవ్యాప్తంగా బక్రీద్ వేడుకలు ఘనంగా జరుగుతున్నాయి. బక్రీద్ పర్వదినం సందర్భంగా హైదరాబాద్ నగరంలో పలుచోట్ల ముస్లిం సోదరులు బక్రీద్ ప్రార్థనలను పెద్దఎత్తున నిర్వహిస్తున్నారు. ప్రవక్త హజ్రత్ ఇబ్రహీం ఆయన కుమారుడు ఇస్మాయిల్ చేసిన త్యాగాన్ని స్మరించుకుంటూ ముస్లింలు ఈ పండుగను ఘనంగా చేసుకుంటున్నారు. ఈ క్రమంలో ఈద్గాలు, మసీదుల్లో ముస్లిం సోదరులు ప్రత్యేక ప్రార్థనలు నిర్వహించారు.

Bakrid Festival Celebrations

మసీదులు, ఈద్గాలు ముస్లిం సోదరులతో కిక్కిరిసి పోయాయి. ఇబ్రహీం స్ఫూర్తితో దైవమార్గంలో ప్రాణాన్ని సైతం త్యాగం చేస్తామంటూ ముస్లింలంతా బక్రీద్ రోజు నమాజ్ పూర్తయిన తర్వాత ఖుర్భానీ ఇస్తారు. ప్రపంచ వ్యాప్తంగా లక్షలాది మంది హజ్ యాత్రికులు బక్రీద్ రోజు మక్కాను సందర్శించి ప్రత్యేక ప్రార్థనలు చేస్తారు. ఇస్లాం సాంప్రదాయం ప్రకారం బక్రీద్ పండుగను పవిత్ర దినంగా భావిస్తారు.

ఇక మాదన్నపేట, గోల్కొండ, మక్కా మసీదు, మీరాలం, హజ్‌హౌస్ తదితర ప్రాంతాల్లో ఉదయం నుంచే ప్రార్థనలు ప్రారంభమయ్యాయి. సుమారు 120 మసీదులు బక్రీదు కోసం ముస్తాబు అయ్యాయి. ఉదయం 8.30 నుంచి 10.30 గంటల వరకూ ఈద్-ఉల్-అజ్ హా ప్రార్థనలు జరిగాయి. నగరంలో భారీ బందోబస్తు ఏర్పాటు చేసినట్టు నగర పోలీసు కమిషనర్ మహేందర్‌రెడ్డి తెలిపారు. ఎలాంటి అవాంఛనీయ సంఘటటనలు జరుగకుండా 10 వేల మందితో భద్రతను కట్టుదిట్టంగా నిర్వహించనున్నట్టు ఆయన పేర్కొన్నారు. ముస్లింలు ప్రార్థనలు జరుపుకునే ఈద్గాల వద్ద సీసీ కెమెరాలతో భద్రతా పహారాను కొనసాగిస్తామన్నారు.