దర్శకుడు రాజమౌళి దాదాపు 5 ఏళ్ల తన దర్శకత్వ జీవితాన్ని బాహుబలికి అంకితం చేశారు. ఇంత సమయం తీసుకుంటుందని ఆయనకు కూడా తెలియదని ఓ ఇంటర్వ్యూలో అన్నారు. అందుకు ఆయనకు గొప్ప ఫలితమే దక్కినప్పటికీ ఈ ఐదేళ్లలో ఈ ప్రాజెక్ట్ కోసం ఆయన అహర్నిశలూ కష్టపడ్డారు. ప్రాంచైజీలో చివరి భాగమైన ‘బాహుబలి-ది కంక్లూజన్’ రిలీజైనప్పటికే ఆయన విశ్రాంతి తీసుకోకుండా ప్రమోషనల్ కార్యక్రమాల్లో పాల్గొంటూ వివిధ దేశాల్లో పర్యటించారు. చిత్రబృందంతో కలిసి లండన్‌లో చిత్ర ప్రచార కార్యక్రమంలో పాల్గొన్న ఆయన.. ఇక ఈ ప్రచారంతో బాహుబలి సినిమా సిరీస్‌ పూర్తైపోయినట్టేనని ట్విటర్‌ ద్వారా తెలిపారు. ఈ చిత్రం గొప్ప విజయం సాధించిన సందర్భంగా అందరికీ ధన్యవాదాలు తెలుపుతూ చిత్రబృందంతో కలిసి దిగిన ఫొటోను ట్విటర్‌ ద్వారా పంచుకున్నారు.
And with this last leg of promotion in london my job with Baahubali film series is completely over..
A big hug and thanks to everyone..🙏 pic.twitter.com/rt3V6Xx8oi— rajamouli ss (@ssrajamouli) May 4, 2017
‘బాహుబలి-2’ ఇప్పటికే బాక్సాఫీస్‌ వద్ద రికార్డుల వర్షం కురిపిస్తున్న సంగతి తెలిసిందే. వసూళ్ల పరంగా ఈ చిత్రం రోజుకో కొత్త రికార్డును నెలకొల్పుతోంది. ఇక తెలుగు రాష్ట్రాల్లో అయితే ప్రేక్షకులు ఈ చిత్రానికి కాసుల వర్షం కురిపిస్తున్నారు. ప్రదర్శితమవుతున్న అన్ని థియేటర్లు దాదాపు హౌజ్ ఫుల్ కలెక్షన్లతో నడుస్తున్నాయి. దీంతో 5 రోజులకే రూ. 100 కోట్ల షేర్ ను దక్కించుకున్న ఈ చిత్రం 6వ రోజు కూడా అదే జోరును కొనసాగించింది.
