హాలీవుడ్ లెజెండరీ దర్శకుడు జేమ్స్ కామెరాన్ ‘అవతార్’ మూవీతో ఓ అద్భుతం సృష్టించాడు. ఈ సినిమా చూసిన వాళ్లు ఎవరైనా సరే.. అందులోని వింతల్ని, కొత్త ప్రపంచాల్ని మరిచిపోలేరు. 2009లో వచ్చిన ఈ సినిమా హైలెవెల్‌ గ్రాఫిక్ వర్క్‌తో ప్రేక్షకులను కట్టిపడేసింది. ఒక కొత్త ఊహా లోకంలో విహరించేలా చేసింది. ఇలాంటి లోకం కూడా ఒకటి ఉంటుందా అనే విధంగా జేమ్స్ కామెరాన్.. విజువల్స్‌తో వండర్ చేశాడు. ఇప్పుడు తాజాగా అవతార్ 2 సినిమాకు సంబంధించిన అప్ డేట్ వచ్చింది.
ఈ సినిమా విడుదలకు సంబంధించి తాజాగా ఓ వార్త సోషల్ మీడియాలో హల్‌చల్ చేస్తోంది. ట్విట్టర్లో అవతార్ 2 హ్యాష్‌ట్యాగ్ ట్రెండ్ అవుతోంది. చాలామంది సినీ ప్రముఖులు కూడా ఆ విషయాన్ని ధ్రువీకరిస్తున్నారు. అదేంటంటే.. అవతార్ 2 సినిమా విడుదల తేదీ బయటికొచ్చేసింది. డిసెంబర్ 16, 2022న అవతార్ 2 సినిమా ప్రపంచవ్యాప్తంగా దాదాపు 160 భాషల్లో విడుదల కాబోతున్నట్లు టాక్ వినిపిస్తోంది.
అంతేకాదు.. సినిమాకాన్‌ వేదికగా ప్రపంచ నలుమూలల నుంచి హాజరయిన సినీ ప్రముఖల సమక్షంలో అవతార్ 2 గ్లింప్స్‌ ఈరోజు ప్రదర్శితం కాబోతున్నట్లు తెలిసింది. అయితే.. ఈ గ్లింప్స్‌ చూసే అవకాశం కేవలం లాస్‌ వెగాస్‌లోని సినిమాకాన్‌ ఈవెంట్‌కు హాజరయ్యే వారికి మాత్రమే ఉండటం గమనార్హం. ప్రేక్షకుల కోసం అవతార్ 2 గ్లింప్‌ను మే 6న థియేటర్లలో ప్రదర్శించనున్నట్లు సోషల్ మీడియాలో జోరుగా ప్రచారం జరుగుతోంది.
