నీతి ఆయోగ్‌ పాలకమండలి మూడో సమావేశం ఆదివారం ప్రారంభమైంది. ప్రధానమంత్రి నరేంద్రమోదీ అధ్యక్షతన జరిగిన ఈ సమావేశానికి కేంద్రమంత్రులు రాజ్‌నాథ్‌సింగ్‌, నితిన్‌ గడ్కరీ, జావడేకర్‌, రాష్ట్రాల ముఖ్యమంత్రులు, లెఫ్ట్‌నెంట్‌ గవర్నర్‌లు, ప్రధాన కార్యదర్శులు హాజరయ్యారు.15ఏళ్ల దీర్ఘకాలిక ప్రణాళిక ప్రధాన ఏజెండాగా జరుగుతున్న ఈ సమావేశంలో ప్రధాని మాట్లాడుతూ.. జీఎస్టీపై ఏకాభిప్రాయానికి రావడం చరిత్రలో నిలిచిపోతుందన్నారు.
ఒకే దేశం, ఒకే ఆశయం, ఒకే నిర్ణయం ఇదే GST లక్ష్యమని పేర్కొన్నారు. ఒకే దేశం, ఒకేసారి ఎన్నికలు అని ప్రధాని ఈ సందర్భంగా నినాదాన్ని ఇచ్చారు. ఒకేసారి ఎన్నికల నిర్వహణపై దేశవ్యాప్తంగా చర్చలు కొనసాగాలని కోరారు. అన్ని రాష్ట్రాలు, అందరు ముఖ్యమంత్రులు సమష్టిగా కృషిచేస్తేనే నవభారత్‌ సాధ్యమవుతుందని ప్రధాని మోదీ ఈ సందర్భంగా అన్నారు.
ప్రధాని అధ్యక్షతన జరిగిన నీతిఆయోగ్‌ పాలకమండలి సమావేశానికి పశ్చిమ బెంగాల్, ఢిల్లీ సీఎంలు మమతాబెనర్జీ, అరవింద్‌ కేజ్రీవాల్‌ గైర్హాజరయ్యారు. కాగా.. కేజ్రీవాల్‌ స్థానంలో డిప్యూటీ సీఎం మనీశ్‌ సిసోడియా ఢిల్లీ తరఫున హాజరయ్యారు.
