దేశవ్యాప్తంగా లాక్‌డౌన్‌ నేపథ్యంలో వలస కార్మికులు సొంత గ్రామాలకు వెళ్ళెందుకు ఎన్నో ఇబ్బందులు పడుతున్నారు. అయితే వీరి అవస్తలు చూసిన పలువురు ప్రముఖులు వారికి అండగా నిలుస్తున్నారు. వలస కూలీల కోసం బస్‌లు, రైళ్లు, విమానాలు బుక్ చేయడం, ఆహారం అందించడం ఇలా పలు సేవా కార్యక్రమాలు చేస్తూ తమ మంచి మనసు చాటుకుంటున్నారు. వీరిలో ప్రముఖంగా బాలీవుడ్ యాక్టర్‌ సోనూసూద్ గురించి చెప్పుకోవాలి. వలస కూలీల కోసం బస్‌లు, రైళ్లు, విమానాలు ఏర్పాటు చేసి రియల్‌ హీరో అనిపించుకున్నాడు.
ఇక తాజాగా ఈ జాబితాలో బాలీవుడ్ మెగాస్టార్‌ అమితాబచ్చన్‌ చేరారు. వలస కార్మికులను తమ సొంతప్రాంతాలకు తరలించేందుకు నాలుగు ప్రత్యేక విమానాలను ఏర్పాటు చేశారు. ముంబై విమానాశ్రయం నుంచి బుధవారం బయల్దేరిన ఈ విమానాల్లో 700కు పైగా వలస కార్మికులను తరలించినట్టు ఆయన సన్నిహితులు తెలిపారు. అలహాబాద్‌, గోరఖ్‌పూర్‌, వారణాసికి ఈ ప్రత్యేక విమానాలు నడిచినట్టు వెల్లడించారు. గురువారం మరో రెండు ప్రత్యేక విమానాల్ని కూడా ఏర్పాటు చేయనున్నట్టు వివరించారు. కాగా వలస కార్మికుల తరలింపు కోసం బచ్చన్‌ ఇటీవల పది ప్రత్యేక బస్సులను కూడా ఏర్పాటు చేశారు. ఈ సందర్భంగా బిగ్‌ బీకి వలస కార్మికులు తమ కృతఙ్ఞతలను తెలుపుతున్నారు.
