ప్రస్తుత రోజుల్లో హీరోల మార్కెట్ రేంజ్ సినిమా సినిమాకు బాగానే పెరుగుతోంది. దీంతో రెమ్యునరేషన్ కూడా బాగానే పెంచేస్తున్నారు. అయితే డబ్బును ఉపయోగం లేకుండా దాచుకుంటే ఏం వస్తుందని నాలుగు రూపాయలు ఖర్చుపెట్టి లాభాన్ని పొందాలని అనుకుంటున్నారో తెలియదు గాని నిర్మాతలుగా మారిపోతున్నారు. హిట్టు సినిమాలు తీసిన అనుభవం ఉంది. మంచి కథ ఎదో తెలుసుకునే ఆలోచన ఉంది కాబట్టి కొత్తవారికి ఛాన్స్ ఇచ్చి మంచి కథలను సొంతంగా ప్రొడ్యూస్ చేయాలనీ అనుకుంటున్నారు.
ఇదే క్రమంలో మెగా ఫ్యామిలీ నుంచి వచ్చిన పవన్ కల్యాణ్ సొంత బ్యానర్ ను ఏర్పాటు చేసుకున్న విషయం తెలిసిందే. ఈ బ్యానర్ పై యువ హీరోలతో సినిమాలు చేయడానికి ఆయన ఆసక్తిని చూపుతున్నాడు. ఇక చరణ్ కూడా సొంత బ్యానర్ ను ఏర్పాటు చేసుకున్నాడు. చిరంజీవి 150వ సినిమా అయిన ‘ఖైదీ నెంబర్ 150’ ఈ బ్యానర్ పైనే రూపొందింది. ఇప్పుడు ‘సైరా’ కూడా భారీ బడ్జెట్ తో ఇదే బ్యానర్లో రూపొందుతోంది.
ఇక బన్నీ కూడా సొంత బ్యానర్ ను ఏర్పాటు చేసుకునే ఆలోచనలో ఉన్నాడనే టాక్ ఫిల్మ్ నగర్లో జోరుగా వినిపిస్తోంది. ఆల్రెడీ వీరికి గీతా ఆర్ట్స్ బ్యానర్ ఉన్నప్పటికీ, అది అల్లు అరవింద్ వారసులందరికీ చెందినది అవుతుంది. అందువలన తనకంటూ ఒక బ్యానర్ ఉండాలనే ఆలోచనతో బన్నీ అందుకు సంబంధించిన సన్నాహాలు మొదలుపెట్టాడని అంటున్నారు. ఈ బ్యానర్ పై వరుసగా చిన్న బడ్జెట్ సినిమాలను నిర్మించాలనే దిశగా ఆయన రంగాన్ని సిద్ధం చేస్తున్నట్టుగా సమాచారం.
