ఎస్సీ/ఎస్టీ చట్టాన్ని రద్దు చేయాలి!

యూనివర్సిటీ గ్రాంట్స్ కమిషన్ (UGC) కొత్త మార్గదర్శకాలను నిలిపివేసినప్పటికీ, అసలు పెద్ద సమస్య ఎస్సీ/ఎస్టీ (అత్యాచారాల నివారణ) చట్టం రద్దేనని, అది ఫిబ్రవరి 6లోపు ఉపసంహరించకపోతే కేంద్ర ప్రభుత్వాన్ని కూలదోస్తామని సస్పెండ్ అయిన బరేలీ మేజిస్ట్రేట్ అలంకార్ అగ్నిహోత్రి హెచ్చరించారు.

సోమవారం ఆయన షెడ్యూల్డ్ కులాలు, షెడ్యూల్డ్ తెగలు (అత్యాచారాల నివారణ) చట్టం–1989పై తీవ్ర ఆందోళన వ్యక్తం చేస్తూ, ఫిబ్రవరి 6లోపు ఈ చట్టాన్ని రద్దు చేయాలని డిమాండ్ చేశారు. లేనిపక్షంలో ప్రజా తిరుగుబాటు ద్వారా కేంద్ర ప్రభుత్వాన్ని గద్దె దించుతామని హెచ్చరించారు. స్వామి అవిముక్తేశ్వరానంద ఆహ్వానం మేరకు ఆదివారం రాత్రి వారణాసి వెళ్లిన అగ్నిహోత్రి, అక్కడ ఆధ్యాత్మిక నేతతో సమావేశమై తదుపరి కార్యాచరణపై చర్చించారు.

యూజీసీ కొత్త నిబంధనలను సుప్రీంకోర్టు నిలిపివేసినప్పటికీ, అసలు కీలకమైన అంశం ఎస్సీ/ఎస్టీ చట్టాన్ని రద్దు చేయడమేనని ఆయన మరోసారి స్పష్టం చేశారు. ఫిబ్రవరి 6 తుది గడువని పేర్కొంటూ, అప్పటిలోపు చట్టం రద్దు కాకపోతే కేంద్ర ప్రభుత్వాన్ని చార్టర్డ్ విమానంలో గుజరాత్‌కు పంపిస్తాం అని వ్యాఖ్యానించారు.

ప్రారంభంలో రాష్ట్ర ప్రభుత్వంతో విభేదాలు ఉన్నప్పటికీ, ఇప్పుడు కేంద్ర ప్రభుత్వాన్నే ఎందుకు లక్ష్యంగా చేసుకుంటున్నారని అడిగిన ప్రశ్నకు, తమ పోరాటం మొదటినుంచి కేంద్ర ప్రభుత్వంతోనేనని, రాష్ట్రంతో కాదని ఆయన వివరణ ఇచ్చారు.

ప్రధానమంత్రి నరేంద్ర మోదీ, కేంద్ర హోంమంత్రి అమిత్ షా రాష్ట్ర ప్రభుత్వాన్ని అస్థిరపర్చే ప్రయత్నంలో భాగంగా వివక్ష చూపుతున్నారని ఆయన ఆరోపించారు. రాష్ట్ర పరిపాలన తీవ్ర ఒత్తిడిలో పనిచేస్తోందని కూడా అన్నారు. రాష్ట్రానికి సంబంధించిన నిధులన్నీ గుజరాత్‌కు మళ్లించే ఏర్పాట్లు జరుగుతున్నాయని అగ్నిహోత్రి ఆరోపించారు. ప్రయాగ్‌రాజ్‌లోని మాఘ్ మేళాలో శంకరాచార్యుల స్నాన కార్యక్రమానికి సంబంధించిన వివాదం నేపథ్యంలో ఆయన తన పదవికి రాజీనామా చేయడంతో అప్పటినుంచి మీడియా దృష్టిలో నిలిచారు.

సనాతన సంస్కృతికి సంబంధించిన చిహ్నాలు అవమానించబడుతున్నాయని చూసినప్పుడు నేను తట్టుకోలేక రాజీనామా చేశాను అని ఆయన వ్యాఖ్యానించారు.

Also Read:కేసీఆర్‌ను కలిసిన గూడెం మధుసూదన్