అక్కినేని హీరో అఖిల్ తనలోని కొత్త కోణాన్ని బయటపెట్టి అందర్నీ సర్‌ప్రైజ్‌ చేశారు. అబుదాబిలో అట్టహాసంగా జరిగిన సైమా వేడుకల్లో అఖిల్ అక్కినేని పాటతో అదరగొట్టాడు. దక్షిణాది తారలంతా సందడి చేసిన ఈ వేడుకల్లో అందాల భామలు అదిరేటి స్టెప్పులతో ఆకట్టుకున్నారు. రెజీనా, ప్రణీత, నిక్కీ గల్రానీ డాన్సులు అలరించాయి.
ఇక అఖిల్ అక్కినేని ఇచ్చిన ప్రదర్శన ప్రత్యేక ఆకర్షణగా నిలిచింది. తన తొలి సినిమాతోనే నటుడిగా, డ్యాన్సర్‌గా ఆకట్టుకున్న ఈ యువ కథానాయకుడు.. సైమా వేదికపై గాయకుడిగానూ ప్రూవ్ చేసుకున్నాడు. దీన్ని ప్రత్యక్షంగా తిలకించిన అతడి తండ్రి అక్కినేని నాగార్జున పుత్రోత్సాహంతో పరవశించిపోయాడు.
ఈ ప్రదర్శన నాగ్‌కు ఎంతో సంతోషాన్ని ఇచ్చిందట. తాజాగా ఆయన ట్విటర్ ద్వారా అఖిల్‌కు అభినందలు తెలిపాడు. ‘సైమా 2017 వేదికపై అఖిల్ పాడుతుండగా నేను అక్కడే ఉన్నాను, ఈ ప్రదర్శన కోసం అఖిల్ ఎంతో సాధన చేశాడు’ అంటూ నాగార్జున ట్వీట్ చేశాడు.
కింగ్ నాగార్జున తన తనయుల కెరీర్‌ను చక్కబెట్టే పనిలో ఉన్నట్లు కనిపిస్తున్నాడు. నాగచైతన్య, అఖిల్‌కు మార్గనిర్దేశం చేస్తూ.. సినిమాల్లో వారిని బాగా ప్రోత్సహిస్తున్నాడు. అవసరమైతే గెస్ట్ అప్పీయరెన్స్‌లతోనూ తోడ్పాటు అందిస్తున్నాడు.
ఇప్పటికే ‘రారండోయ్ వేడుక చూద్దాం’ సినిమా నాగచైతన్యకు మంచి కమర్షియల్ సక్సెస్ అందించిన విషయం తెలిసిందే. మరోవైపు విక్రమ్ కుమార్ దర్శకత్వంలో అఖిల్ రెండో సినిమా తెరకెక్కుతోంది. ఇంకా టైటిల్‌ ఖరారు చేయని ఈ చిత్రంలోని ‘యేవేవో కలలు కన్నా..’ అనే గీతాన్ని అఖిల్ సైమా వేదికపై పాడారు. గత కొన్ని రోజులుగా ఈ చిత్రం షూటింగ్‌ జరుగుతోంది.
