జూనియర్ ఎన్టీఆర్ హోస్ట్‌గా వచ్చిన తెలుగు రియాల్టీ షో ‘బిగ్ బాస్’ ఎవరూ ఊహించని సక్సెస్ సాధించింది. విన్నర్‌గా శివబాలాజీ నిలిచాడు. ముఖ్యంగా ఈ షో హిట్ కావడానికి కారణం హోస్ట్ జూనియర్ ఎన్టీఆర్ అని చెప్పడంలో ఎలాంటి సందేహం లేదు. వెండితెరపై ఫుల్ ఎనర్జీతో ఇరగదీసే ఎన్టీఆర్.. బిగ్ బాస్ సీజన్ 1లో అదే జోష్ చూపించాడు. మొదట బిగ్ బాస్ కాంటెస్ట్ లను చూసి అందరూ నిరాశ పొందినా.. శని ఆదివారాల్లో వచ్చిన తారక్.. ఆ నిరాశను దూరం చేశారు. అదే షోకు పెద్ద ఆకర్షణ అని బుల్లితెర ప్రేక్షకులు చెబుతున్నారు. అయితే మొదటి సీజన్ విజయవంతం కావడంతో, రెండో సీజన్ గురించి టాక్ మొదలైంది. బిగ్ బాస్ సీజన్ 2ను ఎవరు హోస్ట్ చేస్తారన్న చర్చ మొదలైంది.
రెండో సీజన్‌లో పాల్గోనేందుకు సినీ ఇండస్ట్రీలో మంచి పేరున్న యాక్టర్స్‌ కంటెస్టెంట్లుగా రాబోతున్నారని సమాచారం. అయితే ఈ షోలో ఎవరూ పాల్గోన్నా మొదటి సీజన్ పర్ఫామెన్సే ఉంటుందని ప్రేక్షకులు అంచనా వేస్తున్నారు. సీజన్ 2కు కొత్త కళను తీసుకురావడానికి మా యాజమాన్యం కొత్త హోస్ట్‌ను తీసుకోబోతున్నారని, అందుకోసం న్యాచురల్ స్టార్ నానిని స్టార్ మా యాజమాన్యం సంప్రదించినట్టు, ఆయన ఓకే చేసినట్టు వార్తలు వచ్చాయి. కానీ నాని నుంచి కూడా ఎలాంటి క్లారిటీ రాకపోవడంతో , బిగ్ బాస్ 2కు ఎవరు హోస్ట్‌గా వ్యవహరిస్తారని ప్రేక్షకులు ఆసక్తిగా ఎదురుచూస్తున్నారు. తాజా సమాచారం ప్రకారం ‘బిగ్ బాస్’ సీజన్ -2కు కూడా జూనియర్ ఎన్టీఆరే వ్యాఖ్యాతగా వ్యవహరించనున్నాడని తెలిసింది. ఈ మేరకు ఓ న్యూస్ ఛానెల్ జూనియర్ ఎన్టీఆర్ ని సంప్రదించగా తానే వ్యాఖ్యాతగా కొనసాగనున్నట్టు ఆయన చెప్పారట. దీంతో, ‘బిగ్ బాస్’ హోస్ట్‌గా ఎన్టీఆరే అని బుల్లితెర ప్రేక్షకులకు ఓ క్లారిటీ వచ్చేసినట్టే.
