మాజీ మంత్రి,మహేశ్వరం కాంగ్రెస్ ఎమ్మెల్యే సబితా ఇంద్రారెడ్డి టీఆర్ఎస్‌లో చేరికకు రంగం సిద్ధమైంది. ఇప్పటికే సీఎం కేసీఆర్‌తో సమావేశమైన సబితా త్వరలోనే చేవెళ్లలో నిర్వహించే భారీ బహిరంగసభలో టీఆర్ఎస్‌లో చేరనున్నారు.
ఈ నేపథ్యంలో మహేశ్వరం మాజీ ఎమ్మెల్యే,స్ధానిక టీఆర్ఎస్ నేత తీగల కృష్ణారెడ్డితో భేటీ అయ్యారు. కుమారుడు కార్తీక్‌తో కలిసి తీగల ఇంటికి వెళ్లిన సబితా ఆయన్ని మర్యాదపూర్వకంగా కలిశారు. టీఆర్ఎస్‌లో చేరికతో పాటు భవిష్యత్‌లో పార్టీ బలోపేతం వంటి అంశాలను చర్చించారు. సబితతో పాటు స్ధానిక కాంగ్రెస్,టీఆర్ఎస్ నేతలు ఈ భేటీలో పాల్గొన్నారు.
బుధవారం ప్రగతిభవన్‌లో తన ముగ్గురు కుమారులతో కలిసి సీఎం కేసీఆర్‌ని కలిసిన సబిత పార్టీలో చేరిక విషయాన్ని చర్చించారు. కార్తీక్ రెడ్డికి చేవెళ్ల లోక్ సభ సీటు కేటాయించాలని కోరినట్లు తెలుస్తోంది. ఈ నేపథ్యంలో చేవెళ్ల సీటు కార్తీక్ రెడ్డికే అంటూ స్ధానికంగా ప్రచారం జరుగుతోంది.
