నాగార్జున, నాని మందు కొడుతూ ప్రేక్షకులముందుకు వచ్చారు. అవును.. మీరు విన్నది నిజమే..! వీళ్ళిద్దరూ కలిసి నటిస్తున్న చిత్రం “దేవదాసు” ఫస్ట్ లుక్ ఈ మధ్యే సోషల్ మీడియాలోకి వచ్చి విపరీతమైన క్రేజ్ ని సృష్టించిన సంగతి తెలిసిందే.
నాగ్, నాని ఇద్దరూ మందుకొట్టి పడుకున్నట్టు వచ్చిన పోస్టర్ తెలుగు ప్రేక్షకులను బాగా ఆకట్టుకుంది. ఈ సినిమా టీజర్ ని నాగార్జున పుట్టిన రోజుకి విడుదల చేస్తారనుకుంటే ముందే వచ్చి అందరిని ఆశ్చర్యానికి గురిచేస్తోంది. ఇందులో విశేషం ఏమిటంటే మొన్న మందుకొట్టి పడిపోయిన వీళ్ళిద్దరూ, ఈ సారి ఏకంగా మందుకొడుతూ ప్రేక్షకులకు దర్శనమిచ్చారు.
గ్లాసులో మందు పోసుకుంటున్న నాగార్జునను చూసి తనకు కూడా మందు పోయమని నాని ఓ గ్లాస్ పెట్టడం. సరే అని నాగార్జున మందు పోసి, “సోడా కావాలా..? వాటర్ కావాలా” అని అడిగే లోపే నాని గ్లాస్ ఎత్తేయడం.. అది చూసి నాగార్జున “దాసూ..ఏంటి సంగతి..?” అని అడగడం చాలా సరదాగా ,ప్రేక్షకులను ఆకట్టుకునేలా టీజర్ ని రూపొందించారు. శ్రీరామ్ ఆదిత్య దర్శకత్వం లో వస్తున్న ఈ చిత్రం సెప్టెంబర్ 27 న ప్రేక్షకులను చేరుకుంటుందని టీజర్ తో స్పష్టం చేసింది చిత్ర బృందం.
