సంజయ్ దత్ జీవితం ఆధారంగా రూపొందుతున్న బయోపిక్ ‘సంజూ’ సినిమా టీజర్ ను చిత్రయూనిట్ రిలీజ్ చేసింది. టీజర్ సినీ అభిమానులను అలరిస్తోంది. “కొత్తగా చెప్పడానికి ఏముంది? నా జీవితం తెరిచిన పుస్తకం..ఇందులో శిఖరాలు, అగాధాలు చవిచూశాను. లంగ్స్ పాడయ్యేలా డ్రగ్స్ తీసుకున్నాను..డాక్టర్ కూడా బతికించలేమన్నాడు… కానీ మహ్మదాలీకి పోటీగా బాడీని పెంచాను. చార్టర్డ్ ఫ్లైట్ ఎక్కాను.. బస్ టికెట్ కోసం నడిరోడ్డు మీద భిక్షమెత్తాను..కిటికీలోంచి ప్రపంచం మొత్తాన్ని చూశాను… కిటికీయే లేని గదుల్లోనూ ఉన్నాను” అంటూ సంజయ్ దత్ పాత్ర ధారి రణ్ బీర్ కపూర్ చెబుతున్న డైలాగులుఆకట్టుకున్నాయి.
ఒక్క మాటలో చెప్పాలంటే రణ్ బీర్ కపూర్ మాయ చేసేశాడు. బాడీ లాంగ్వేజ్ మొదలుకుని గొంతు దాకా ప్రతి ఒక్క విషయంలో సంజయ్ దత్ ను అనుకరిస్తూ అద్భుతమైన ఎక్స్ ప్రెషన్స్ తో కట్టి పడేసాడు. చిన్న టీజర్ అయినప్పటికీ మొత్తం సంజయ్ పాత్ర ఎన్ని షేడ్స్ లో ఉంటుందో రకరకాల గెటప్స్ లో చూపించిన రాజ్ కుమార్ హిరాని మరోసారి వెండితెరపై సరికొత్త ట్రెండ్ కు శ్రీకారం చుట్టబోతున్నట్టు కనిపిస్తోంది.
తన కథ తనే చెప్పుకున్నట్టు ఈ టీజర్ లో యవ్వనం మొదలుకుని వయసు మళ్లే దాకా మొత్తం కవర్ చేసినట్టు కనిపిస్తోంది. రణ్ బీర్ కపూర్ మాత్రం ఇంతకంటే గొప్పగా ఎవరు చేయలేరు అన్నంతగా పరకాయ ప్రవేశం చేసాడు. రణ్ బీర్ కపూర్ టైటిల్ రోల్ కు ప్రాణం పోశాడని టీజర్ చూస్తే తెలుస్తోంది. ఈ సినిమాలో ఇంకా పరేశ్ రావల్, మనీషా కోయిరాలా, అనుష్క శర్మ, సోనమ్ కపూర్, దియా మీర్జా, విక్కీ కౌశల్, జిమ్ సార్బా, బోమన్ ఇరానీ తదితరులు నటిస్తున్నారు.
