సినీ నటి, కాంగ్రెస్ నేత ఖుష్బూ ప్రధాని మోదీపై సంచలన ఆరోపణలు చేసింది..పార్లమెంటులో విపక్షాల తీరును నిరసిస్తూ, ప్రధాని నరేంద్ర మోదీ గురువారం నాడు చేబట్టిన ఉపవాస దీక్షను తమిళనాడు కాంగ్రెస్ నేత, సినీ నటి ఖుష్బూ ఎద్దేవా చేశారు. ఆ రోజు తమిళనాడు పర్యటనకు వచ్చిన ప్రధాని విమానంలోనే ఉదయం టిఫిన్, మధ్యాహ్నం భోజనం తీసుకున్నారని ఖుష్బూ సంచలన విమర్శ చేశారు. ప్రపంచంలో భోజనం చేసి దీక్ష చేపట్టిన ఏకైక ప్రధాని నరేంద్ర మోదీయేనని ఆమె వ్యంగ్యంగా అన్నారు. తమిళుల ఆందోళనలకు భయపడిన ప్రధాని రోడ్డు మార్గంలో ప్రయాణించకుండా హెలికాప్టర్ లో తిరిగారని ఖుష్బూ విమర్శించారు.
అయితే మొన్ననే కాంగ్రెస్ పార్టీ నేతలు ఢిల్లీలో ఒక రోజు దీక్ష చేయటం.. అందుకు ముందుగా ఒక హోటల్లో చోళా భటూరా మొదలుగా టిఫిన్లు భారీగా లాగించి దీక్షకు కూర్చున్నారంటూ ఫోటో విడుదల చేసి మరీ కాంగ్రెస్ మీద దుమ్మెత్తి పోసింది బీజేపీ. ఇదేనా మీ దీక్ష అంటూ.. భారీ ప్లేట్ ముందు పెట్టుకొని కాంగ్రెస్ నేతలు టిఫిన్ చేస్తున్న ఫోటోవైరల్ కావటంతో పాటు.. ఒక రోజు దీక్ష కాస్తా నవ్వులపాలైంది.
ఇదిలా ఉంటే.. తమ దీక్షను కామెడీషోగా మార్చిన బీజేపీ మీద కాంగ్రెస్ ఆగ్రహంగా ఉంది. దెబ్బకు దెబ్బ అన్న రీతిలో బీజేపీ మీదా అదే తరహా ఆరోపణ చేయాలని తపిస్తోంది. ఇందులో భాగంగా తాజాగా తమిళనాడు కాంగ్రెస్ నేత.. ప్రముఖ సినీ నటి ఖుష్బూ రంగంలోకి దిగారు. ప్రధాని మోడీ చేసిన దీక్షను నవ్వులపాలు చేసే ప్రయత్నం చేశారు. అయితే.. ఈ క్రమంలో ఆమె ఈ ఆసక్తికర వ్యాఖ్య చేశారు.
