సిట్ విచారణ తర్వాత చార్మిని చూస్తే వీర వనిత ఝాన్సీ లక్ష్మీబాయిని మించిన ధైర్యవంతురాలిలా కనిపించిందని ఆర్జీవీ వ్యాఖ్యానించిన సంగతి తెలిసిందే. చార్మి సంతోషాన్ని చూస్తుంటే సిట్ బృందాన్ని ఆమే ఇంటరాగేట్ చేసినట్టు కనిపిస్తోందని అన్నారు. ఈ నేపథ్యంలో వర్మ వ్యాఖ్యలపై రచయిత జొన్నవిత్తుల మండిపడ్డారు.
వర్మ… సిట్ అధికారి కార్యాలయం నుంచి వస్తున్న చార్మిని చూస్తుంటే వీరనారి ఝాన్సీ లక్ష్మీబాయిలాగా ఉన్నది అని. ఇంతకుపూర్వం కన్నా చాలా అందంగా కనిపించిందని అన్నారు. అది చాలా ఇబ్బందికరమైన వ్యాఖ్య అన్నారు. ఆ వ్యాఖ్యలను ఆయన వెనక్కి తీసుకోవాలన్నారు. ఎందుకంటే, చార్మి వీరనారి కాదు. సిట్ అధికారులు ఆంగ్లేయులు కాదని ఆర్జీవీ గుర్తుంచుకోవాలన్నారు.
ఓ డ్రగ్ నేరారోపణలో అనుమానితురాలిగా ఆవిడను పిలిచి, వాళ్లు విచారణ చేస్తున్నారు. ఆ విచారణ ముగించుకుని బయటకు వచ్చినప్పుడు, ఆవిడ నిబ్బరంగా ఉందని అనొచ్చు. లేకుంటే, మరో విధంగా ఆమెను ప్రశంసించొచ్చు. దానికేమీ ఎవరికీ అభ్యంతరాలు ఉండవుగానీ, ఒక ఝాన్సీ లక్ష్మీబాయిలా కనిపించిందనడం ఇబ్బందికరంగా అనిపించదన్నారు.
దేశ ప్రజలు అందరూ కూడా ఝాన్సీని దేశభక్తికి ప్రతీకగా, ప్రతినిధిగా ఆరాధారిస్తారు. చార్మీ ఝాన్సీలా కనిపించిందంటే, ఆమెలో అందం కనిపించకూడదు. సాహసం, పరాక్రమం, త్యాగం… ఇవి కనిపించాలి. అలా కాకుండా, ఇలా వ్యాఖ్యానించడం, చాలామందిని కోపావేశాలకు గురి చేస్తుంది. ఈ వ్యాఖ్యలు వెనక్కు తీసుకుంటే బాగుంటుంది. సిట్ పై ఆయన అభిప్రాయాలను చెప్పవచ్చు. కానీ, దేశభక్తురాలితో చార్మిని పోల్చడం తగదు. రాంగోపావర్ వర్మ ప్రతిష్ఠకూ మచ్చగా మిగులుతుంది” అని జొన్నవిత్తుల మండిపడ్డారు.
