SEM కోర్టు ఎదుట సీజేపీ కార్యకర్తలు!

కాక్రోచ్ జనతా పార్టీ (సీజేపీ) కార్యకర్తలు సౌరవ్ దాస్, ఆశుతోష్ రంకా శుక్రవారం ప్రత్యేక ఎగ్జిక్యూటివ్ మేజిస్ట్రేట్ (ఎస్ఈఎం) కోర్టు ఎదుట హాజరుకానున్నారు. జంతర్ మంతర్ వద్ద జరిగిన నిరసనకు సంబంధించిన కేసులో వీరు కోర్టుకు హాజరుకావాల్సి ఉంది. మరోవైపు, ఈ వ్యవహారంపై ఢిల్లీ పోలీసుల క్రైమ్ బ్రాంచ్ కూడా దర్యాప్తు కొనసాగిస్తోంది.

జంతర్ మంతర్ వద్ద అక్టోబర్ 13న జరిగిన నిరసన కార్యక్రమానికి సంబంధించి సౌరవ్ దాస్, ఆశుతోష్ రంకాలను పోలీసులు అదుపులోకి తీసుకున్నారు. అనంతరం వారిని జ్యుడీషియల్ కస్టడీకి పంపించారు. అయితే, శాంతిభద్రతలకు విఘాతం కలిగించబోమని లిఖితపూర్వక హామీ ఇవ్వడంతోపాటు, వ్యక్తిగత బాండ్‌, ష్యూరిటీ బాండ్లను సమర్పించిన నేపథ్యంలో అక్టోబర్ 21న ప్రత్యేక ఎగ్జిక్యూటివ్ మేజిస్ట్రేట్ కోర్టు వారిని విడుదల చేయాలని ఆదేశించింది. ఒక్కొక్కరు రూ.50 వేల బాండ్లు సమర్పించాలని కోర్టు సూచించింది.

ఈ కేసు దర్యాప్తులో భాగంగా సౌరవ్ దాస్, ఆశుతోష్ రంకా, అజింక్య షిండేలను ఢిల్లీ పోలీసుల క్రైమ్ బ్రాంచ్ విచారణకు పిలిచింది. అయితే అక్టోబర్ 22న వారు విచారణకు హాజరుకాకుండా మరింత సమయం కోరారు. దీంతో వారికి కొత్త నోటీసులు జారీ చేయనున్నట్లు పోలీసులు తెలిపారు.

Also Read:పాలమూరుకు కరువు..రేవంత్ వైఫల్యమే

జంతర్ మంతర్‌ను నిరసనలకు అనుమతించిన ప్రదేశాల జాబితా నుంచి తొలగించిన నేపథ్యంలో, అక్కడికి అనుమతి లేకుండా ప్రవేశించారన్న ఆరోపణలపై ఈ కేసు నమోదైంది. ఈ వ్యవహారంపై తదుపరి కోర్టు విచారణ శుక్రవారం మధ్యాహ్నం 3 గంటలకు జరగాల్సి ఉంది.