ప్రధానమంత్రి నరేంద్ర మోదీపై కాంగ్రెస్ అధ్యక్షుడు, రాజ్యసభలో ప్రతిపక్ష నేత మల్లికార్జున ఖర్గే విమర్శలు గుప్పించారు. కేంద్ర పార్లమెంటరీ వ్యవహారాల శాఖ మంత్రి కిరణ్ రిజిజుకు ప్రధాని మోదీ నిజమైన అధికారాలు ఇవ్వలేదని వ్యాఖ్యానించారు. పార్లమెంటులో కీలక బిల్లులు, ప్రతిపక్షాలతో సంప్రదింపుల విషయంలో కేంద్ర ప్రభుత్వ వైఖరిపై ఆయన అసంతృప్తి వ్యక్తం చేశారు.
పార్లమెంటరీ వ్యవహారాల మంత్రి కిరణ్ రిజిజు ఇటీవల ఖర్గేకు లేఖ రాశారు. నియోజకవర్గాల పునర్విభజన (డీలిమిటేషన్) ప్రతిపాదనపై చర్చించేందుకు ప్రభుత్వం పలుమార్లు ప్రయత్నించిందని, కాంగ్రెస్ నుంచి తగిన స్పందన రాలేదని ఆయన పేర్కొన్నారు. కీలక చట్టాల విషయంలో ప్రతిపక్షాలు నిర్మాణాత్మకంగా వ్యవహరించాలని కోరారు.
దీనిపై కాంగ్రెస్ నాయకత్వం అభ్యంతరాలు వ్యక్తం చేసింది. డీలిమిటేషన్ వంటి కీలక అంశాలపై అన్ని పార్టీలతో చర్చించిన తర్వాతే ముందుకు వెళ్లాలని కాంగ్రెస్ డిమాండ్ చేస్తోంది. ఈ నేపథ్యంలో అధికార, ప్రతిపక్షాల మధ్య రాజకీయ విభేదాలు మరింత పెరిగాయి.ఓటర్ల జాబితాల ప్రత్యేక సమగ్ర సవరణ (SIR), నియోజకవర్గాల పునర్విభజన, మహిళా రిజర్వేషన్ల అమలు వంటి అంశాలపై ప్రధానమంత్రి నరేంద్ర మోదీతో చర్చించనున్నట్లు ఖర్గే గతంలో వెల్లడించారు. ఈ అంశాలకు సంబంధించి ప్రధానికి ఇప్పటికే రెండు లేఖలు రాసినట్లు తెలిపారు.
Also Read:ఎమ్మెల్యే వివేకా బర్త్ డే..గ్రీన్ ఛాలెంజ్
ఎస్‌ఐఆర్‌ ప్రక్రియ వల్ల ఓటర్లకు నష్టం కలగకుండా చూడాలని, డీలిమిటేషన్ విషయంలో అన్ని రాష్ట్రాలకు న్యాయం జరగాలని కాంగ్రెస్ కోరుతోంది. మహిళా రిజర్వేషన్ల అమలులో జాప్యంపై కూడా ఖర్గే ప్రశ్నలు లేవనెత్తారు. డీలిమిటేషన్ బిల్లుపై చర్చలు, పార్లమెంటరీ ప్రక్రియ, ప్రతిపక్షాలతో సంప్రదింపులు ప్రస్తుతం రాజకీయంగా ప్రాధాన్యం సంతరించుకున్నాయి. కీలక బిల్లుల ఆమోదానికి ప్రతిపక్షాలు సహకరించాలని కేంద్ర ప్రభుత్వం కోరుతుండగా, జాతీయ ప్రాధాన్యం ఉన్న అంశాలపై అన్ని పార్టీలతో చర్చలు జరపాలని కాంగ్రెస్ పట్టుబడుతోంది.