ముఖ్యమంత్రి రేవంత్ రెడ్డి కుటుంబానికి సంబంధించిన వ్యాపార వ్యవహారాలపై బీఆర్ఎస్ నేత మన్నె క్రిశాంక్ పలు ఆరోపణలు చేశారు. ముఖ్యమంత్రి కుమార్తె అనుముల నైమిష రెడ్డి నిర్మిస్తున్నట్లు ఆయన పేర్కొన్న పాఠశాలలో దుంప శిరీష అనే మహిళ భాగస్వామిగా ఉన్నారని ఆరోపించారు. మెడికోవర్ ఆసుపత్రి, మ్యాక్స్ బీఎన్ ఫార్మా వంటి సంస్థలతోనూ ఆమెకు వ్యాపార సంబంధాలు ఉన్నాయని క్రిశాంక్ పేర్కొన్నారు.
కొంపల్లిలో భారీ స్థాయిలో నైమిష రెడ్డి ఇంటర్నేషనల్ స్కూల్ నిర్మాణం జరుగుతోందని చెబుతూ.. రేవంత్ రెడ్డి ప్రభుత్వం మూడేళ్లలో ఎన్ని ప్రభుత్వ పాఠశాలలు, ప్రభుత్వ ఆసుపత్రులు నిర్మించిందో చెప్పాలని క్రిశాంక్ ప్రశ్నించారు. నైమిష రెడ్డి స్కూల్‌కు సంబంధించిన సంస్థలో దుంప శిరీష, అనుముల నైమిష రెడ్డి పేర్లు ఉన్నాయని, గీతా ఆటోమోటివ్‌కు కూడా సంబంధం ఉందని ఆయన ఆరోపించారు.
అదే సమయంలో మెడికోవర్ వ్యవహారంపైనా క్రిశాంక్ పలు ప్రశ్నలు సంధించారు. దుంప శిరీష పేరుతో పెట్టుబడులు ఉన్నాయని, సాహృదయ హెల్త్‌కేర్ సంస్థ ద్వారా మెడికోవర్ ఆసుపత్రి కార్యకలాపాలు సాగాయని ఆయన ఆరోపించారు. అయితే అందుబాటులో ఉన్న కార్పొరేట్ రికార్డులు, వ్యాపార నివేదికల్లో మెడికోవర్ ఇండియా సాహృదయ హెల్త్‌కేర్ ద్వారా నిర్వహించబడుతున్నట్లు, మెడికోవర్‌కు చెందిన హోల్డింగ్ సంస్థకు సుమారు 67 శాతం వాటా ఉన్నట్లు సమాచారం ఉంది.
2026 ఆగస్టులో కేకేఆర్.. మెడికోవర్ ఇండియా వ్యాపారాన్ని సుమారు 1.2 బిలియన్ యూరోలు అంటే దాదాపు రూ.13,000–14,000 కోట్ల విలువైన లావాదేవీలో కొనుగోలు చేసేందుకు ఒప్పందం కుదుర్చుకున్నట్లు నివేదికలు వెల్లడించాయి. ఈ లావాదేవీలో ఇప్పటికే ఉన్న వాటాదారుల వాటాల విక్రయంతో పాటు సంస్థలో కొత్తగా పెట్టుబడులు పెట్టే అంశం కూడా ఉంది.
ఇక గీతా ఆటోమోటివ్ ఎల్‌ఎల్‌పీకి సంబంధించిన అందుబాటులో ఉన్న కార్పొరేట్ వివరాల్లో అనుముల నైమిష రెడ్డి, సత్యనారాయణ రెడ్డి గోలుగూరి డిజిగ్నేటెడ్ పార్ట్‌నర్లుగా నమోదై ఉన్నారు.
Also Read:యువీ రికార్డును సమం చేసిన అభిషేక్
దుంప శిరీషకు సంబంధించిన ఆరోపణలు, నైమిష రెడ్డి స్కూల్‌లో భాగస్వామ్యం వంటి అంశాలపై క్రిశాంక్ చేసిన వ్యాఖ్యలకు సంబంధించి సంబంధిత వ్యక్తులు లేదా సంస్థల నుంచి అధికారిక వివరణ వెలువడాల్సి ఉంది. ఈ ఆరోపణలను బీఆర్ఎస్ నేత చేసినవిగా మాత్రమే పరిగణించాల్సి ఉంటుంది.