బంగాళాఖాతంలో ఏర్పడిన తీవ్ర వాయుగుండం శ్రీకాకుళం జిల్లా కళింగపట్నం సమీపంలో తీరాన్ని దాటింది. దీని ప్రభావంతో రాగల 48 గంటల పాటు ఆంధ్రప్రదేశ్, తెలంగాణ రాష్ట్రాల్లో భారీ నుంచి అత్యంత భారీ వర్షాలు కురిసే అవకాశం ఉందని వాతావరణ శాఖ హెచ్చరించింది.
ఈ తీవ్ర వాయుగుండం కారణంగా కోస్తాంధ్ర తీవ్ర ప్రభావానికి లోనవుతోంది. ఇప్పటికే పలు జిల్లాల్లో విస్తారంగా వర్షాలు కురుస్తుండగా, అధికారులు ముందస్తు జాగ్రత్త చర్యలు వేగవంతం చేశారు.వాతావరణ శాఖ హెచ్చరికల నేపథ్యంలో ప్రభుత్వం వర్షాల తీవ్రత ఆధారంగా జిల్లాలను అలర్ట్ చేసింది:
రెడ్ అలర్ట్ (అత్యంత భారీ వర్షాలు): అల్లూరి సీతారామరాజు, ఏలూరు జిల్లాలు.
ఆరెంజ్ అలర్ట్ (భారీ వర్షాలు): శ్రీకాకుళం, విజయనగరం, పార్వతీపురం మన్యం, విశాఖపట్నం, అనకాపల్లి, తూర్పు గోదావరి, పశ్చిమ గోదావరి జిల్లాలు.
రాత్రి నుంచి కురిసిన కుండపోత వర్షానికి విశాఖపట్నం నగరం తడిసిముద్దయింది. పలు లోతట్టు ప్రాంతాలు జలమయమవ్వడంతో పాటు రోడ్లపై నీరు చేరి రవాణా వ్యవస్థ తీవ్రంగా స్తంభించింది.తీరం వెంట గంటకు 50-60 కిలోమీటర్ల వేగంతో ఈదురుగాలులు వీస్తుండటం, సముద్రంలో అలల ఉధృతి తీవ్రంగా ఉండటంతో ఈ నెల 27 వరకు మత్స్యకారులు ఎవరూ వేటకు వెళ్లకూడదని అధికారులు కఠిన ఆదేశాలు జారీ చేశారు.
ముంపు ముప్పు ఉన్న ప్రాంతాల్లో తక్షణ సహాయక చర్యల కోసం ఎన్డీఆర్‌ఎఫ్ (NDRF), ఎస్‌డీఆర్‌ఎఫ్ (SDRF) బృందాలను రంగంలోకి దించారు. స్థానిక యంత్రాంగం కూడా అప్రమత్తమై సహాయ పునరావాస కేంద్రాలను సిద్ధం చేస్తోంది. ప్రజలు అత్యవసరం అయితే తప్ప బయటకు రాకూడదని అధికారులు సూచించారు. వర్షాలు, వరదల నేపథ్యంలో అత్యవసర సాయం మరియు సమాచారం కోసం ఆర్టీవీ కమాండ్ సెంటర్ (RTV Command Center) ప్రత్యేక హెల్ప్‌లైన్ నంబర్లను అందుబాటులోకి తెచ్చింది.
Also Read:BB10:లెటర్స్‌ కోసం టెంప్టేషన్ వార్!
హెల్ప్‌లైన్ నంబర్లు:
📞 040-69316611
📞 040-69316622
రాగల 48 గంటల పాటు తీవ్ర అప్రమత్తత అవసరమని, ప్రజలందరూ స్థానిక అధికారుల ఆదేశాలను పాటించాలని ప్రభుత్వం కోరింది.