ప్రపంచవ్యాప్తంగా ప్రస్తుతం జరుగుతున్న వివిధ యుద్ధాలు, సైనిక ఘర్షణల వల్ల కోట్లాది మంది ప్రజల జీవితాలు అతలాకుతలమవుతున్నాయని ప్రజాశాంతి పార్టీ అధ్యక్షుడు, ప్రముఖ గ్లోబల్ పీస్ అంబాసిడర్ డాక్టర్ కేఏ పాల్ సంచలన వ్యాఖ్యలు చేశారు.
ప్రస్తుతం ప్రపంచంలో సుమారు 58 ప్రధాన యుద్ధాలు లేదా అంతర్గత సాయుధ పోరాటాలు జరుగుతున్నాయని, వీటన్నింటి ప్రభావం ప్రపంచవ్యాప్తంగా ఉన్న 200కు పైగా దేశాలపై తీవ్రంగా పడిందని ఆయన ఆవేదన వ్యక్తం చేశారు.
యుద్ధాల కారణంగా అంతర్జాతీయ సరఫరా వ్యవస్థలు (సప్లై చైన్) పూర్తిగా దెబ్బతిన్నాయని, దీనివల్ల నిత్యావసర వస్తువుల ధరలు, ఇంధన ధరలు ఆకాశాన్ని తాకుతున్నాయని కేఏ పాల్ పేర్కొన్నారు. యుద్ధం వల్ల నేరుగా బాంబు దాడులకు గురయ్యే ప్రజలే కాకుండా, ప్రపంచవ్యాప్తంగా ఉన్న సామాన్య పౌరులు కూడా ఆర్థికంగా, ఆహార భద్రత పరంగా తీవ్రంగా నష్టపోతున్నారని వ్యాఖ్యానించారు.
ప్రపంచవ్యాప్తంగా శాంతిని ఆకాంక్షించే నాయకులు, దేశాలు మరియు పౌరులంతా ఈ యుద్ధాలను ఆపేందుకు వెంటనే చేతులు కలపాలని ఆయన పిలుపునిచ్చారు.
Also Read:చీమ లాగే వినాయకుడి రథం..
ఈ దిశగా అమెరికా రాజధాని వాషింగ్టన్ వేదికగా ఒక అంతర్జాతీయ శాంతి సందేశాన్ని ఇవ్వనున్నట్లు కేఏ పాల్ వెల్లడించారు. అమెరికా హౌస్ స్పీకర్ మైక్ జాన్సన్తో కలిసి తాను ఈ రోజు సాయంత్రం వేదికపై నుండి ప్రపంచానికి శాంతి సందేశాన్ని అందించనున్నట్లు ప్రకటించారు. యుద్ధాలను విరమించి, ప్రాణనష్టాన్ని మరియు ఆర్థిక వినాశనాన్ని అరికట్టడమే తమ ప్రధాన లక్ష్యమని ఆయన పునరుద్ఘాటించారు.