శ్రీవారి సన్నిధిలో ఇస్రో ఛైర్మన్

భారత అంతరిక్ష పరిశోధన సంస్థ (ఇస్రో) ఛైర్మన్ డాక్టర్ వి. నారాయణన్ తిరుమల శ్రీ వేంకటేశ్వర స్వామివారిని దర్శించుకున్నారు. బుధవారం ఉదయం స్వామివారిని దర్శించుకుని ప్రత్యేక పూజలు నిర్వహించిన అనంతరం, ఆలయ పండితులు ఆయనకు వేదాశీర్వచనం అందించి తీర్థప్రసాదాలను బహూకరించారు.

ఈ సందర్భంగా ఆయన మీడియాతో మాట్లాడుతూ ఇస్రో తలపెట్టిన రాబోయే అంతరిక్ష ప్రయోగానికి సంబంధించిన వివరాలను వెల్లడించారు.శ్రీహరికోటలోని సతీష్ ధావన్ స్పేస్ సెంటర్ (షార్) రెండవ లాంచ్ పాడ్ నుండి సెప్టెంబర్ 4న తెల్లవారుజామున ఈ ఉపగ్రహ ప్రయోగం జరగనుంది.

ఈ ప్రయోగంలో GSLV-F17 ప్రయోగ నౌక ద్వారా EOS-05 (Earth Observation Satellite-05) అనే అత్యాధునిక భూ పరిశీలన ఉపగ్రహాన్ని నింగిలోకి పంపనున్నారు.జియో-స్టేషనరీ (భూ స్థిర) కక్ష్యలో ప్రయోగిస్తున్న భారతదేశపు తొలి అత్యాధునిక ఇమేజింగ్ శాటిలైట్ ఈ EOS-05 అని ఇస్రో ఛైర్మన్ తెలిపారు.

ఈ ఉపగ్రహం ద్వారా దేశ సరిహద్దులపై నిరంతర నిఘాతో పాటు, ప్రకృతి వైపరీత్యాల పర్యవేక్షణ, వ్యవసాయం, అటవీ విస్తీర్ణం మరియు పర్యావరణ మార్పులకు సంబంధించిన కీలక డేటాను ఎప్పటికప్పుడు పొందవచ్చని ఆయన వివరించారు.

Also Read:IRGC:రెండోరోజు వైమానిక దాడులు