అధ్యక్షుడిగా డోనాల్డ్ ట్రంప్ తన రెండవ విడత పాలనలో ఇమ్మిగ్రేషన్ నిబంధనలను కఠినతరం చేస్తున్న నేపథ్యంలో ప్రపంచవ్యాప్తంగా వీసా అపాయింట్మెంట్లను అమెరికా నిలిపివేసింది. కాన్సులర్ అధికారులకు నిర్వహించే గ్లోబల్ ట్రైనింగ్ ప్రోగ్రామ్ (శిక్షణా కార్యక్రమం) వల్లే ఈ ఆటంకం ఏర్పడిందని విదేశాంగ శాఖ చెప్తున్నప్పటికీ, అక్రమ మరియు చట్టబద్ధమైన ఇమ్మిగ్రేషన్ రెండింటినీ నియంత్రించే విస్తృత ప్రయత్నాలలో భాగంగానే ఈ నిర్ణయం తీసుకున్నట్లు తెలుస్తోంది.
ఇప్పటికే ఇంటర్వ్యూలు షెడ్యూల్ అయిన దరఖాస్తుదారుల అపాయింట్మెంట్లు సర్దుబాటు అయ్యాయని, కొత్త తేదీలు మరియు సమయాలను వారికి తెలియజేస్తామని అమెరికా తెలిపింది. పూర్తి స్థాయిలో ఇంటర్వ్యూలు ఎప్పుడు ప్రారంభమవుతాయో చెప్పకపోవడంతో, విదేశాల్లోని అమెరికన్ ఎంబసీలు లేదా కాన్సులేట్ల ద్వారా ఇమ్మిగ్రెంట్ వీసాలు పొందాలనుకునే వారికి అనిశ్చితి నెలకొంది.
ప్రపంచవ్యాప్తంగా ఉన్న అమెరికా ఎంబసీలు మరియు కాన్సులేట్లలో అధికారులకు నిర్వహిస్తున్న శిక్షణా కార్యక్రమం వల్లే ఈ తాత్కాలిక నిలిపివేత అని విదేశాంగ శాఖ తెలిపింది. వీసా దరఖాస్తులను కాన్సులర్ అధికారులు “సమగ్రంగా మరియు నిలకడగా” పరిశీలించేలా తీర్చిదిద్దడానికే ఈ శిక్షణ అని ప్రభుత్వం పేర్కొంది. ముఖ్యంగా అమెరికా ప్రజా సంక్షేమ పథకాలపై ఆధారపడే అవకాశం ఉన్న దరఖాస్తుదారులను గుర్తించడంపై ఈ శిక్షణలో దృష్టి సారిస్తున్నారు.
విదేశాంగ శాఖ ప్రతినిధి ఒకరు మాట్లాడుతూ: “అమెరికా మరింత సమృద్ధిగా మారాలంటే, వీసా దరఖాస్తుదారులు అమెరికా చట్టాల ప్రకారం ప్రభుత్వ సహాయంపై ఆధారపడే ‘పబ్లిక్ ఛార్జ్’గా మారకుండా చూడాలి. అలాగే అవసరంలో ఉన్న అమెరికన్ల కోసం ఉద్దేశించిన సంక్షేమ ఫలాలపై వీరు ఆధారపడకుండా నిరోధించాలి” అని తెలిపారు. ఈ శిక్షణ నిమిత్తం అపాయింట్మెంట్లను సర్దుబాటు చేస్తున్నట్లు అధికారులు చెప్పారు.
షెడ్యూల్ అయిన ఇంటర్వ్యూలు వాయిదా పడ్డాయి. కొత్త తేదీలు ఇస్తామని చెప్పినప్పటికీ, విదేశాంగ శాఖ నిర్దిష్ట సమయాన్ని వెల్లడించలేదు. అంటే ఇది పూర్తిగా వీసాల నిలిపివేత కాదు, కేవలం శిక్షణా కార్యక్రమం పూర్తి అయ్యే వరకు ఏర్పడిన అనిశ్చిత ఆలస్యం మాత్రమే.2025 జనవరిలో మళ్లీ అధికారంలోకి వచ్చినప్పటి నుండి ట్రంప్ అక్రమ ఇమ్మిగ్రేషన్పైనే కాకుండా చట్టబద్ధమైన ఇమ్మిగ్రేషన్పై కూడా కఠిన చర్యలు చేపట్టారు. సరిహద్దుల్లో పటిష్ట భద్రత, డిపోర్టేషన్లు (వెనక్కి పంపడం), వీసా పరిశీలనను కఠినతరం చేయడం, శరణార్థుల ప్రవేశంపై పరిమితులు మరియు గ్రీన్ కార్డ్ దరఖాస్తులపై నిఘా పెంచడం వంటి చర్యలు చేపట్టారు.
నైపుణ్యం కలిగిన విదేశీ ఉద్యోగుల కోసం ఉద్దేశించిన H-1B వీసా కొత్త దరఖాస్తు రుసుమును గతంలో ఉన్న 2,000 నుండి 5,000 డాలర్ల నుండి ఏకంగా 103,265 డాలర్లకు పెంచే ప్రతిపాదన తెచ్చారు. అయితే ఇది ప్రస్తుతం న్యాయపరమైన సవాళ్లను ఎదుర్కొంటోంది.అమెరికా వీసాల కోసం దరఖాస్తు చేసుకునే విదేశీ జర్నలిస్టుల సోషల్ మీడియా ఖాతాలను పరిశీలించేందుకు చర్యలు చేపట్టారు.H-1B వీసాలకు దరఖాస్తు చేసే టెక్ నిపుణులు మరియు వారి కుటుంబ సభ్యుల లింక్డ్ఇన్ (LinkedIn) ప్రొఫైళ్లు, రెజ్యూమెలను తీవ్రంగా పరిశీలించాలని కాన్సులర్ అధికారులను ఆదేశించారు.
అమెరికాకు వచ్చే వారు అక్కడి ప్రభుత్వ సహాయంపై ఆధారపడకుండా తమను తాము పోషించుకోగలగాలి అనేది ట్రంప్ ప్రభుత్వ ప్రధాన వాదన. ఈ కారణంతోనే జనవరిలో 75 దేశాలకు చెందిన దరఖాస్తుదారులకు ఇమ్మిగ్రెంట్ వీసాల జారీని నిలిపివేశారు.ఆగస్టు 21న ఒక అమెరికా ఫెడరల్ జడ్జి (జడ్జ్ జానెట్ వర్గాస్) 75 దేశాలపై విధించిన ఇమ్మిగ్రెంట్ వీసా నిషేధాన్ని కొట్టివేశారు. విదేశాంగ కార్యదర్శి మార్కో రూబియో తన పరిధికి మించి ఈ నిర్ణయం తీసుకున్నారని, కేవలం జాతీయత ఆధారంగా వీసాలను నిరాకరించడం చట్టవిరుద్ధమని న్యాయమూర్తి తీర్పునిచ్చారు. ట్రంప్ ప్రభుత్వం తెచ్చే నిబంధనలకు కోర్టుల రూపంలో చట్టపరమైన అడ్డంకులు ఎదురవుతున్నాయని ఇది స్పష్టం చేస్తోంది.
Also Read:తృణమూల్ రెబెల్ ఎంపీలకు నోటీసులు
సాధారణ వీసా ఇంటర్వ్యూలు ఎప్పుడు తిరిగి ప్రారంభమవుతాయనే దానిపై విదేశాంగ శాఖ ఇంకా స్పష్టత ఇవ్వలేదు. అలాగే, కాంగ్రెస్ అనుమతి లేక విదేశాంగ శాఖ సొంతంగా అమలు చేసే ఇమ్మిగ్రేషన్ మార్పులను న్యాయస్థానాలు అడ్డుకునే అవకాశం ఉన్నందున, రాబోయే రోజుల్లో ట్రంప్ ప్రభుత్వం మరిన్ని చట్టపరమైన సవాళ్లను ఎదుర్కొనే అవకాశం ఉంది.