సంచలనం సృష్టించిన మాదక ద్రవ్యాల కేసులో ప్రముఖ సినీ దర్శకుడు పూరీ జగన్నాథ్‌ ఎక్సైజ్‌ ప్రత్యేక బృందం (సిట్‌) విచారణలో పలు కీలక సమాచారాన్ని రాబట్టిన సంగతి తెలిసిందే. పూరి తర్వాత విచారణకు హాజరైన శ్యామ్ కె నాయుడు, సుబ్బరాజుల నుంచి కూడా అధికారులు కావాల్సిన ఆధారాలను సేకరించారు. ముఖ్యంగా వీరినుంచి పూరికి కెల్విన్‌కు మధ్య ఉన్న సంబంధం, డ్రగ్స్ ఎక్కడి నుంచి వచ్చాయి..?,పూరితో బ్యాంకాక్‌ వెళ్లి ఏం చేసేవారు వంటి ప్రశ్నలకు సమాధానం రాబట్టారు. అంతేగాదు స్వయంగా కేసును పర్యవేక్షిస్తున్న అకున్ సబర్వాల్ సినిమా ఇండస్ట్రీకి డ్రగ్స్ ఎవరు సరఫరా చేస్తున్నారో తెలిసిందంటూ ప్రకటించడంతో కేసు విచారణ దాదాపుగా ఓ కొలిక్కి వచ్చిందని అంతా భావిస్తున్నారు.
ఈ నేపథ్యంలో పొలిటికల్, సినిమా రంగానికి చెందిన వారి జాతకాలపై తరచు విశ్లేషణలు ఇచ్చే ప్రముఖ జ్యోతిష్యుడు వేణు స్వామి ఆసక్తికర విషయాలను వెల్లడించారు. ఈ జ్యోతిష్కుడు చెపుతున్న అంచనాల ప్రకారం పూరి జీవితాన్ని ఈ కేసు ఒక కుదుపు కుదుపు కుదుపుతుందని ఈ కేసువల్ల పూరి జీవితంలో ఏర్పడ్డ మచ్చ అంత సులువుగా మాసిపోదని చెబుతున్నాడు. దీనికి పూరి జాతకంలోని లోపాలే కారణమని మరో రెండు సంవత్సరాలు పూరికి ఇబ్బందులు తప్పవని చెప్పారు.
అదేవిధంగా చార్మి జాతకంలో ఏలినాటి శని నడుస్తోందని అందువల్ల ఆమెకు సమస్యలు తప్పకపోవచ్చని వేణు స్వామి చెప్పినట్లు తెలుస్తోంది. అయితే సెప్టెంబర్ 9 తరువాత పూరి చార్మీలు ఈ కేసు నుండి బయట పడతారని వేణు స్వామి చెపుతున్నట్లు తెలుస్తోంది. ఈ ఏడాది ప్రారంభంలోనే కొంతమంది టాలీవుడ్ ప్రముఖులు పై తీవ్ర ఆరోపణలు వస్తాయని తాను విశ్లేషణలు చేసిన విషయాన్ని వేణు స్వామి గుర్తుకు చేస్తున్నాడు.
