బెంగళూరు నగరంలో ఆహార నాణ్యత, పరిశుభ్రత ప్రమాణాలను పెంపొందించే లక్ష్యంతో కర్ణాటక ఆహార భద్రత మరియు నాణ్యత ప్రమాణాల శాఖ అధికారులు విస్తృత తనిఖీలు చేపట్టారు. ఈ క్రమంలో తీవ్ర నిబంధనల ఉల్లంఘనలు వెలుగుచూడటంతో ప్రముఖ క్విక్-కామర్స్ ప్లాట్ఫామ్ ‘జెప్టో’ (Zepto) వేర్హౌస్తో పాటు ప్రభుత్వానికి చెందిన ‘ఇందిరా క్యాంటీన్’ ప్రాంగణాన్ని అధికారులు సీల్ చేశారు.
బెంగళూరు పరిధిలోని ఒక జెప్టో డార్క్ స్టోర్/వేర్హౌస్లో ఆహార పదార్థాలను నిల్వ చేసే క్రమంలో కనీస పరిశుభ్రత పాటించకపోవడం, ఎక్స్పైరీ (గడువు ముగిసిన) గల వస్తువులను సరైన పద్ధతిలో వేరు చేయకపోవడం మరియు స్థానిక ఎఫ్ఎస్ఎస్ఏఐ (FSSAI) నిబంధనలను ఉల్లంఘించడాన్ని అధికారులు గుర్తించారు. దీనితో సదరు డార్క్ స్టోర్ను తాత్కాలికంగా సీల్ చేసి నోటీసులు జారీ చేశారు.
పేదలకు రాయితీ ధరకు ఆహారాన్ని అందించే ఇందిరా క్యాంటీన్ వంటగది ప్రాంతంలో తీవ్ర దుర్గంధం, పురుగులు మరియు ఈగల సంచారాన్ని అధికారులు గమనించారు. వంట పాత్రలు, తాగునీటి శుభ్రత లోపించడంతో సదరు సెంటర్ను మూసివేయించి శుభ్రత నివేదిక సమర్పించే వరకు సేవలను నిలిపివేశారు.
నగరం అంతటా కల్తీ, నాసిరకం మరియు అపరిశుభ్ర వాతావరణంలో ఆహారాన్ని విక్రయించే రెస్టారెంట్లు, హోటళ్లు, ప్రైవేట్ క్విక్ డెలివరీ యాప్ల ప్రాంగణాలు మరియు ప్రభుత్వ క్యాంటీన్లపై తనిఖీలు నిరంతరం కొనసాగుతాయని ఫుడ్ సేఫ్టీ కమిషనర్ స్పష్టం చేశారు. ప్రజా ఆరోగ్యాన్ని ప్రమాదంలో పడేసే సంస్థలపై చట్టపరంగా కఠిన చర్యలు తీసుకుంటామని హెచ్చరించారు.
Also Read:పెద్ద మనసుతో క్షమించండి:జానీ మాస్టర్