దేశాన్ని రుతుపవనాలు అతలాకుతలం చేస్తున్నాయి. మహారాష్ట్ర, హిమాచల్ ప్రదేశ్లలో ప్రాణ నష్టం సంభవించగా రైలు, రోడ్డు, విమాన సర్వీసులకు తీవ్ర అంతరాయం కలిగింది. జమ్మూ కాశ్మీర్లో అకస్మాత్తుగా వరదలు (ఫ్లాష్ ఫ్లడ్స్), కొండచరియలు విరిగిపడగా, ఒడిశాలో పలు పట్టణాలు జలమయమయ్యాయి. దీంతో పలు రాష్ట్రాల అధికారులు అత్యవసర చర్యలను ముమ్మరం చేశారు. మహారాష్ట్రపై దీని ప్రభావం తీవ్రంగా ఉంది.పుణేలో తాజాగా ముగ్గురు వర్షాల కారణంగా మరణించడంతో గత మూడు నాలుగు రోజుల్లో రాష్ట్రంలో మరణించిన వారి సంఖ్య 13కి చేరింది. హిమాచల్ ప్రదేశ్లో సోమవారం కొండపై నుండి రాయి దూసుకువచ్చిన (షూటింగ్ స్టోన్) ఘటనలో 14 ఏళ్ల బాలిక మృతి చెందింది.
వాయుగుండం ప్రభావంతో ఒడిశాలో వరుసగా మూడో రోజు కూడా ఎడతెరిపి లేకుండా వర్షాలు కురుస్తుండటంతో రాష్ట్రవ్యాప్తంగా అప్రమత్తత ప్రకటించారు. మంగళవారం వరకు భారీ నుండి అతి భారీ వర్షాలు కురిసే అవకాశం ఉందని ఐఎండీ హెచ్చరించింది మరియు మత్స్యకారులు సముద్రంలోకి వెళ్లవద్దని సూచించింది.
రాజస్థాన్లో అక్కడక్కడ భారీ వర్షాలు కొనసాగుతున్నాయి, సికార్ జిల్లాలోని శ్రీమాధోపూర్ లో గత 24 ఢంటల్లో రాష్ట్రంలోనే అత్యధికంగా 75 మి.మీ వర్షపాతం నమోదైంది. రాబోయే వారంలో రాష్ట్రంలోని పలు ప్రాంతాల్లో నైరుతి రుతుపవనాలు చురుగ్గా ఉంటాయని, ఆగ్నేయ జిల్లాల్లో భారీ వర్షాలు కురిసే అవకాశం ఉందని ఐఎండీ తెలిపింది.
ఢిల్లీలో చాలా వరకు పొడి వాతావరణం ఉన్నప్పటికీ…తీవ్రమైన ఉక్కపోత కారణంగా ప్రజలు ఇబ్బంది పడ్డారు. మరోవైపు ముంబై, థానే, రాయ్గఢ్లకు భారత వాతావరణ శాఖ (IMD) రెడ్ అలర్ట్ ప్రకటించింది. ఎడతెరిపి లేకుండా కురుస్తున్న వర్షాల వల్ల ముంబై మరియు పొరుగు జిల్లాలు దాదాపు స్తంభించిపోయాయి. రహదారులు నీట మునిగాయి, చెట్లు విరిగిపడ్డాయి, అలాగే గోడలు, బిల్ బోర్డులు కూలిన సంఘటనలు వెలుగుచూశాయి.
ముంబై-పుణే ఎక్స్ప్రెస్వేలో కొత్తగా ప్రారంభించిన ‘మిస్సింగ్ లింక్’ సెక్షన్ తన మొదటి పెద్ద రుతుపవనాల పరీక్షలోనే విఫలమైంది. ఒక కాంక్రీట్ పిల్లర్ రోడ్డుపై పడిపోవడంతో పాటు, కొండచరియలు విరిగిపడటం మరియు వరదల కారణంగా అధికారులు ఎక్స్ప్రెస్వేతో పాటు పాత ముంబై-పుణే హైవేలోని కొన్ని భాగాలను మూసివేయాల్సి వచ్చింది.
భోర్ ఘాట్ సెక్షన్లో కొండచరియలు విరిగిపడటంతో కీలకమైన ముంబై-పుణే కారిడార్లో రైలు సర్వీసులను నిలిపివేశారు. రైల్వే ట్రాక్ల కింద ఉన్న రాళ్లు (బల్లాస్ట్) కొట్టుకుపోవడంతో కర్జత్ – ఖోపోలి మధ్య లోకల్ రైలు సర్వీసులు కూడా నిలిచిపోయాయి. పునరుద్ధరణ పనుల అనంతరం సోమవారం సాయంత్రం ఈ సెక్షన్లో పాక్షికంగా రాకపోకలు ప్రారంభమయ్యాయి.
మహారాష్ట్ర ఉభయ సభలు భారీ వర్షాల కారణంగా వాయిదా పడ్డాయి. వాతావరణం సరిగ్గా లేకపోవడం వల్ల కోర్టుకు రాలేకపోతే న్యాయవాదులపై ఎటువంటి ప్రతికూల ఉత్తర్వులు జారీ చేయబోమని బాంబే హైకోర్టు తెలిపింది. ప్రైవేట్ కార్యాలయాల సిబ్బందిని ఇంటి నుండి పని చేయాలని (వర్క్ ఫ్రమ్ హోమ్) అధికారులు సూచించారు.పుణేలోని మావల్ తహసీల్లో కొండచరియలు విరిగిపడి ఇల్లు శిథిలాల కింద పూడుకుపోవడంతో ఇద్దరు మరణించగా, ఖేడ్ తహసీల్లో వరద నీటిలో కొట్టుకుపోయి మరొకరు మరణించారు. నాసిక్లో మంగళవారం త్రియంబకేశ్వర్, ఇగత్పురి మరియు పరిసర పశ్చిమ ప్రాంతాలలో “మేఘ విస్ఫోటనం లాంటి” (cloudburst-like) వర్షాలు కురిసే అవకాశం ఉందని ఐఎండీ హెచ్చరించడంతో అధికారులు హై అలర్ట్ ప్రకటించారు.పాఠశాలలు, కళాశాలలు, వారపు సంతలు మరియు త్రియంబకేశ్వర్, సప్తశృంగి ఆలయాలతో సహా ప్రధాన దేవాలయాలను మూసివేయాలని ఆదేశించారు.
హిమాచల్ ప్రదేశ్లో రాత్రికి రాత్రే కురిసిన భారీ వర్షాల వల్ల అకస్మాత్తుగా వరదలు, కొండచరియలు విరిగిపడి రోడ్లు దిగ్బంధనమయ్యాయి. ఈ ఘటనల్లో 14 ఏళ్ల బాలిక ప్రాణాలు కోల్పోయింది. వరదల కారణంగా చంబా జిల్లాలోని చంబా-తిస్సా రోడ్డు మూసుకుపోగా, కులు జిల్లాలోని లార్జీ-సైంజ్ రోడ్డులో ట్రాఫిక్కు అంతరాయం ఏర్పడింది. షిమ్లా జిల్లాలో వరద నీరు రోడ్లు, ఆట స్థలాలు, పాదచారుల వంతెనలు మరియు వ్యవసాయ క్షేత్రాలను దెబ్బతీసింది.
జమ్మూ కాశ్మీర్లో రాత్రి కురిసిన ఎడతెరిపి లేని వర్షాల వల్ల అకస్మాత్తుగా వరదలు వచ్చి దోడా-కిష్త్వార్ హైవే దెబ్బతింది. కిష్త్వార్ జిల్లాలో నిర్మాణంలో ఉన్న 540 మెగావాట్ల క్వార్ హైడ్రోఎలక్ట్రిక్ ప్రాజెక్ట్ సమీపంలో ట్రాఫిక్ నిలిచిపోయింది మరియు పలు వాహనాలు పూడుకుపోయాయి. హైవేపై భారీగా బురద, బండరాళ్లు, శిథిలాలు పేరుకుపోవడంతో రాకపోకలను నిలిపివేయాల్సి వచ్చింది. ప్రాజెక్ట్ సైట్ వద్ద ఉన్న భారీ యంత్రాలు, ట్రక్కులు మరియు నిర్మాణ సామగ్రి శిథిలాల కింద చిక్కుకున్నాయి. అయితే ఈ వరదల్లో ఎలాంటి ప్రాణనష్టం జరగలేదు.
Also Read:7 వేల కోట్లు..9 వారాలకే రోడ్డు క్లోజ్!