గుండెపోటును ముందుగానే గుర్తించే AI!

దశాబ్ద కాలంగా సేకరించిన ఈసీజీ (ECG)లు మరియు మరణ ధృవీకరణ పత్రాలను విశ్లేషించిన తర్వాత ఆర్టిఫిషియల్ ఇంటెలిజెన్స్ (AI) గుండెలో ఇప్పటివరకు ఎవరికీ తెలియని ఒక రహస్య సంకేతాన్ని కనుగొందని పరిశోధకులు చెబుతున్నారు. సాధారణ వైద్య పరీక్షల్లో ఆరోగ్యంగా ఉన్నట్లు కనిపించే వారిలో కూడా అకస్మాత్తుగా గుండె ఆగిపోయే ప్రమాదాన్ని ఈ సాంకేతికత ముందుగానే గుర్తించగలదు.

ప్రపంచ ఆరోగ్య సంస్థ (WHO) ప్రకారం 2022లో దాదాపు 19.8 మిలియన్ల మంది ప్రాణాలను బలిగొన్న గుండె జబ్బులు ప్రపంచంలోనే అతిపెద్ద ప్రాణాంతక వ్యాధిగా కొనసాగుతున్నాయి. గుండెపోటు,బ్రెయిన్ స్ట్రోక్ వల్ల ఎక్కువ మరణాలు సంభవిస్తున్నప్పటికీ… ‘సడన్ కార్డియాక్ అరెస్ట్’ అనేది ఎలాంటి ముందస్తు హెచ్చరికలు లేకుండా, తమకు గుండె జబ్బు ఉందనే విషయం కూడా తెలియని వారిపై అకస్మాత్తుగా దాడి చేస్తుంది.

సడన్ కార్డియాక్ అరెస్ట్ అనేది గుండె యొక్క ఎలక్ట్రికల్ వ్యవస్థలో అకస్మాత్తుగా తలెత్తే లోపం. దీనివల్ల వృద్ధులే కాకుండా, ఎలాంటి అనారోగ్య చరిత్ర లేని యువ అథ్లెట్లు (క్రీడాకారులు) సైతం అకస్మాత్తుగా ప్రాణాలు కోల్పోతున్నారు. యూనివర్శిటీ ఆఫ్ కాలిఫోర్నియా (UC) బర్కిలీకి చెందిన అసోసియేట్ ప్రొఫెసర్ జియాద్ ఒబెర్‌మేయర్ నేతృత్వంలోని పరిశోధక బృందం ఈ అధ్యయనం కోసం డేటాను సేకరించడానికి దాదాపు పదేళ్ల సమయం తీసుకుంది. స్వీడన్‌కు చెందిన 4.40 లక్షలకు పైగా ఈసీజీలను వారి మరణ ధృవీకరణ పత్రాలతో అనుసంధానించి, భవిష్యత్తులో వచ్చే గుండెపోటు ముప్పును గుర్తించేలా AI కి శిక్షణ ఇచ్చారు. ఆ తర్వాత అమెరికా, తైవాన్ దేశాల రోగుల డేటాతో దీనిని నిర్ధారించారు.

వైద్యులు సాధారణంగా ఉపయోగించే ఈసీజీ (ఎలక్ట్రోకార్డియోగ్రామ్) అనేది గుండె ద్వారా ప్రసరించే విద్యుత్ సంకేతాలను రికార్డ్ చేస్తుంది. ఇది గుండె కొట్టుకునే వేగాన్ని, దాని లయను కొలవడానికి ఉపయోగపడుతుంది. అయితే, గుండె సాధారణంగా రక్తాన్ని పంపింగ్ చేస్తున్నప్పటికీ, అందులో ప్రాణాంతకమైన ఎలక్ట్రికల్ సమస్యలు దాగి ఉండవచ్చు. ప్రస్తుతం అందుబాటులో ఉన్న వైద్య పరీక్షలు ఇటువంటి రోగులను గుర్తించలేకపోతున్నాయి.

Also Read:ఇండోనేషియాకు ప్రధాని మోదీ

కానీ, ఈ AI సాంకేతికత కేవలం ముప్పును అంచనా వేయడమే కాకుండా, ఈసీజీ రీడింగ్స్‌లో ఇప్పటివరకు కార్డియాలజిస్టులు (గుండె నిపుణులు) కూడా గుర్తించని ఒక సరికొత్త వేవ్‌ఫార్మ్ (తరంగం) నమూనాను కనిపెట్టింది. అంటే, ఇది కేవలం ఉన్న సమాచారాన్ని విశ్లేషించడమే కాకుండా, ఒక కొత్త జీవసంబంధిత క్లూను ప్రపంచానికి పరిచయం చేసింది.

ప్రస్తుత ప్రామాణిక పరీక్షల ప్రకారం గుండె ఆగిపోయే వార్షిక ప్రమాదం 4.6 శాతంగా చూపిస్తుండగా, AI ద్వారా గుర్తించిన రోగులలో అది 7 శాతంగా తేలింది. ప్రస్తుతం వైద్యులు గుర్తించలేకపోతున్న దాదాపు 86 శాతం మంది హై-రిస్క్ రోగులను ఈ AI విజయవంతంగా గుర్తించింది. అయితే మా AI హై-రిస్క్ అని చెప్పినంత మాత్రాన నేరుగా వెళ్లి గుండెలో డిఫిబ్రిలేటర్ అమర్చుకోవాలని నేను సూచించను. దీనివల్ల ప్రయోజనం ఏంటంటే, మీరు AI ని పూర్తిగా నమ్మకపోయినా, ప్రమాదంలో ఉన్న రోగులను గుర్తించి వారికి తదుపరి అదనపు వైద్య పరీక్షలు (సాంప్రదాయ రిస్క్ మార్కర్స్) చేయడానికి ఇది ఎంతగానో ఉపయోగపడుతుంది అని ఒబెర్‌మేయర్ స్పష్టం చేశారు.