విమాన ప్రయాణం చేసే ప్రతి ఒక్కరూ ఎయిర్పోర్ట్ సెక్యూరిటీ చెకింగ్ వద్ద ఏదో ఒక సందర్భంలో ఈ పరిస్థితిని ఎదుర్కొనే ఉంటారు. మనం తీసుకెళ్లే వాటర్ బాటిల్, పర్ఫ్యూమ్, బాడీ లోషన్ లేదా షాంపూ వంటివి 100 మిల్లీలీటర్ల (100ml) కంటే ఎక్కువగా ఉంటే భద్రతా సిబ్బంది వాటిని అక్కడే పక్కన పెట్టేస్తారు. చాలామంది ప్రయాణికులకు ఈ నిబంధన ఎంతో విసుగును, అయోమయాన్ని కలిగిస్తుంది. అసలు ఈ 100ml పరిమితి వెనుక ఉన్న ఖచ్చితమైన కారణం ఏమిటి? ప్రపంచవ్యాప్తంగా ఉన్న విమానాశ్రయాలు ద్రవపదార్థాల విషయంలో ఇంత కఠినంగా ఎందుకు వ్యవహరిస్తాయనే దానికి సమాధానం తెలుసుకోవాలనుందా..?
ఈ ద్రవపదార్థాల నియంత్రణ నిబంధన 2006 సంవత్సరంలో అమలులోకి వచ్చింది. అప్పట్లో యునైటెడ్ కింగ్డమ్ (UK) భద్రతా సంస్థలు ద్రవ పేలుడు పదార్థాలతో (Liquid Explosives) విమానాలను పేల్చివేయడానికి ఉగ్రవాదులు పన్నిన ఒక పెద్ద కుట్రను ముందే గుర్తించి భగ్నం చేశాయి. ఉగ్రవాదులు రసాయన ద్రవాలను సాఫ్ట్ డ్రింక్స్ బాటిళ్లలో దాచి విమానంలోకి తీసుకెళ్లి ప్రయాణం మధ్యలో వాటిని కలిపి బాంబుగా మార్చాలని ప్లాన్ చేశారు. ఈ ఘటన ప్రపంచవ్యాప్త విమానయాన రంగాన్ని తీవ్ర దిగ్భ్రాంతికి గురిచేసింది. దీనితో తక్షణమే భద్రతా నిబంధనలను కఠినతరం చేశారు. భారతదేశంతో పాటు అమెరికా, బ్రిటన్, యూరప్ దేశాలు తమ క్యాబిన్ లగేజీలో ద్రవపదార్థాల పరిమితిని విధిస్తూ ఈ అంతర్జాతీయ నిబంధనను అమల్లోకి తెచ్చాయి.
తక్కువ పరిమాణంలో ఉండే ద్రవాలను సులభంగా తనిఖీ చేయవచ్చని, ఒకవేళ అవి ప్రమాదకరమైనవి అయినా కూడా విమానానికి పెద్దగా ముప్పు కలిగించలేవని సెక్యూరిటీ ఏజెన్సీలు నిర్ధారించాయి. అందుకే ప్రయాణికులు 100ml పరిమాణం ఉన్న కంటైనర్లను మాత్రమే తీసుకెళ్లడానికి అనుమతిస్తారు. ఇక్కడ ప్రయాణికులు గమనించాల్సిన ముఖ్యమైన విషయం ఏమిటంటే ఒకవేళ పెద్ద బాటిల్లో కొద్దిగా ద్రవం ఉన్నప్పటికీ ఆ బాటిల్ సైజ్ గనుక 100ml కంటే ఎక్కువగా ఉంటే సెక్యూరిటీ సిబ్బంది దాన్ని అనుమతించరు. ఎందుకంటే ఎయిర్పోర్ట్ స్క్రీనింగ్లో బాటిల్ సైజ్ మాత్రమే చూస్తారు కానీ లోపల ఉన్న పరిమాణాన్ని కాదు. ఈ చిన్న కంటైనర్లన్నింటినీ ఒక పారదర్శకమైన ప్లాస్టిక్ బ్యాగ్లో ఉంచడం ద్వారా భద్రతా తనిఖీలు మరింత వేగంగా పూర్తవుతాయి.
చాలామంది కేవలం నీరు లేదా పానీయాలకు మాత్రమే ఈ రూల్ వర్తిస్తుందని అనుకుంటారు. కానీ ఏవియేషన్ నిబంధనల ప్రకారం ద్రవాలు , జెల్స్ , ఏరోసోల్స్ వర్గాల్లోకి వచ్చే అనేక నిత్యజీవిత వస్తువులకు ఈ పరిమితి వర్తిస్తుంది. వీటిలో నీరు, జ్యూస్, సాఫ్ట్ డ్రింక్స్, పర్ఫ్యూమ్స్, బాడీ స్ప్రేలు, షాంపూలు, లోషన్లు, క్రీములు, టూత్పేస్ట్, ఫేస్ వాష్, హెయిర్ జెల్, షేవింగ్ ఫోమ్, పీనట్ బటర్, జామ్ వంటివన్నీ ఉంటాయి. అందుకే హాని లేని మన వ్యక్తిగత వస్తువులను కూడా ఎయిర్పోర్ట్ సిబ్బంది చెకింగ్ వద్ద ఆపివేస్తుంటారు.
Also read:టెక్నాలజీ యుగంలో జాప్యమా?
అయితే ఈ కఠినమైన నిబంధనకు కొన్ని మినహాయింపులు కూడా ఉన్నాయి. చిన్నపిల్లల ఆహారం, బేబీ మిల్క్, అత్యవసర మందులు, ప్రత్యేక వైద్య ద్రవపదార్థాలకు విమానాశ్రయాల్లో అనుమతి లభిస్తుంది. అయితే భద్రతా సిబ్బంది అడిగినప్పుడు వీటికి సంబంధించిన డాక్టర్ ప్రిస్క్రిప్షన్ లేదా తగిన ఆధారాలను చూపించాల్సి ఉంటుంది. అలాగే ఎయిర్పోర్ట్ సెక్యూరిటీ చెకింగ్ పూర్తయిన తర్వాత లోపల ఉండే డ్యూటీ ఫ్రీ షాపుల్లో కొనుగోలు చేసే ద్రవపదార్థాలను సీల్డ్ ప్యాకింగ్లో ఉంచినట్లయితే విమానంలోకి అనుమతిస్తారు. ప్రయాణికులకు ఇది కొంత ఇబ్బందిగా అనిపించినప్పటికీ అందరి సురక్షిత ప్రయాణానికి ఇది ఎంతో అవసరం.