అలెర్ట్..కోవిడ్‌ను మించిన వైరస్!

హంటా వైరస్ కలకలం..
కోవిడ్‌ను మించి..మరణాల రేటు ఎక్కువ
ఎలుకల ద్వారా వ్యాప్తి..నిర్లక్ష్యం చేస్తే అంతే!

ప్రపంచం ఇంకా కోవిడ్ చేదు జ్ఞాపకాల నుంచి పూర్తిగా కోలుకోకముందే, మరో ప్రాణాంతక వైరస్ వార్తలు ఆందోళన కలిగిస్తున్నాయి. వేగంగా వ్యాపిస్తున్న ‘హంటా వైరస్’ పట్ల ప్రపంచ ఆరోగ్య సంస్థ (WHO) తాజాగా అంతర్జాతీయ హెచ్చరికలు జారీ చేసింది. ముఖ్యంగా ఒక డచ్ క్రూయిజ్ షిప్‌లో చోటుచేసుకున్న మరణాలు ఇప్పుడు ప్రపంచ దేశాలను ఉలిక్కిపడేలా చేస్తున్నాయి.

ఇటీవల అట్లాంటిక్ మహాసముద్రంలో ప్రయాణిస్తున్న ‘MV హోండియస్’ (MV Hondius) అనే డచ్ క్రూయిజ్ షిప్‌లో హంతా వైరస్ బయటపడింది.ఈ వైరస్ బారిన పడి ఇప్పటివరకు ముగ్గురు ప్రయాణికులు మరణించారు.ఈ షిప్‌లో మొత్తం 23 దేశాలకు చెందిన 149 మంది ప్రయాణికులు మరియు సిబ్బంది ఉన్నట్లు సమాచారం.

వైరస్ వ్యాప్తిని అడ్డుకోవడానికి డచ్ ప్రభుత్వం మరియు ఇతర దేశాలతో కలిసి WHO యుద్ధ ప్రాతిపదికన పనిచేస్తోంది. బాధిత ప్రయాణికులను ఐసోలేషన్‌లో ఉంచి చికిత్స అందిస్తున్నారు. హంటా వైరస్ ప్రధానంగా ఎలుకలు (Rodents) మరియు ఇతర కొరికే జంతువుల ద్వారా వ్యాపిస్తుంది. వాటి మూత్రం, మల విసర్జితాలు లేదా లాలాజలంతో నేరుగా సంబంధం ఏర్పడినప్పుడు లేదా అవి ఉన్న గాలిని పీల్చినప్పుడు మనుషులకు ఈ వైరస్ సోకుతుంది.

హంటా వైరస్ చాలా ప్రమాదకరమైనదని, దీని మరణాల రేటు ఎక్కువగా ఉండే అవకాశం ఉందని WHO పేర్కొంది.

హంటా వైరస్ లక్షణాలు..

తీవ్రమైన జ్వరం మరియు తలనొప్పి.

కండరాల నొప్పులు మరియు అలసట.

శ్వాస తీసుకోవడంలో ఇబ్బంది (Pulmonary Syndrome).

తీవ్ర దశలో ఊపిరితిత్తులలో నీరు చేరడం, కిడ్నీలు దెబ్బతినడం.

Also Read:రక్తం గడ్డకట్టడం..ప్రమాదకర సంకేతాలు!

వైరస్ వ్యాపించకుండా WHO ఇప్పటికే అన్ని దేశాలను అలర్ట్ చేసింది. ముఖ్యంగా విదేశీ ప్రయాణాలు చేసే వారు, క్రూయిజ్ షిప్‌లలో ఉండేవారు అప్రమత్తంగా ఉండాలని సూచించింది.ఎలుకలు ఉండే ప్రాంతాలకు దూరంగా ఉండాలి. నివసించే పరిసరాలను శుభ్రంగా ఉంచుకోవాలి.వైరస్ సోకిన ఎలుకల విసర్జితాల వల్ల గాలి కలుషితమయ్యే అవకాశం ఉన్నందున, అనుమానిత ప్రాంతాల్లో మాస్క్ ధరించడం ఉత్తమం.జ్వరం లేదా శ్వాస ఇబ్బందులు తలెత్తితే ఆలస్యం చేయకుండా వైద్యులను సంప్రదించాలి.

కోవిడ్‌తో పోలిస్తే ఇది మనుషుల నుంచి మనుషులకు వ్యాపించే వేగం తక్కువగా ఉన్నప్పటికీ, దీని తీవ్రత మాత్రం చాలా ఎక్కువ. అందుకే భయాందోళన చెందకుండా, ముందస్తు జాగ్రత్తలు పాటించడమే దీనికి సరైన పరిష్కారం అని ఆరోగ్య నిపుణులు సూచిస్తున్నారు.