ఆశా భోస్లే మృతి..మీడియా సంస్థలకు నోటీసులు

భారత నేపథ్య గాయని, సంగీత ప్రపంచ ధ్రువతార ఆశా భోస్లే మరణం (ఏప్రిల్ 12, 2026) పట్ల ప్రపంచవ్యాప్తంగా నివాళులు అర్పిస్తుండగా, పాకిస్తాన్ ప్రభుత్వం మాత్రం తన పాత వైఖరిని మరోసారి ప్రదర్శించింది. ఆమె మృతికి సంబంధించిన వార్తలను కవర్ చేస్తూ, ఆమె పాడిన పాటలను ప్రసారం చేసిన పాకిస్తానీ న్యూస్ ఛానెళ్లకు ప్రభుత్వం నోటీసులు జారీ చేసింది.

పాక్ ఎలక్ట్రానిక్ మీడియా రెగ్యులేటరీ అథారిటీ (PEMRA), ముఖ్యంగా ప్రముఖ మీడియా సంస్థ ‘జియో న్యూస్’ (Geo News) సహా మరికొన్ని ఛానెళ్లకు షోకాజ్ నోటీసులు పంపింది.

పాకిస్తాన్ సుప్రీంకోర్టు ఉత్తర్వుల ప్రకారం పాక్ ఛానెళ్లలో భారతీయ చలనచిత్రాలు లేదా పాటలు ప్రసారం చేయడంపై నిషేధం ఉంది.ఆశా భోస్లే మరణ వార్తను చదువుతున్న సమయంలో ఆమె పాటలను, సినిమా క్లిప్పింగ్‌లను ప్లే చేయడం కోర్టు ధిక్కరణ కిందకు వస్తుందని PEMRA నోటీసులో పేర్కొంది.

ఈ చర్యపై పాక్ మీడియా వర్గాల నుంచి తీవ్ర వ్యతిరేకత వ్యక్తమవుతోంది. ‘జియో న్యూస్’ మేనేజింగ్ డైరెక్టర్ అజర్ అబ్బాస్ సోషల్ మీడియా వేదికగా స్పందిస్తూ.. “కళకు, కళాకారులకు సరిహద్దులు ఉండవు. ఒక గొప్ప గాయని మరణించినప్పుడు ఆమె చేసిన కృషిని గుర్తు చేసుకోవడం సర్వసాధారణం. దీనిపై నోటీసులు ఇవ్వడం శోచనీయం” అని పేర్కొన్నారు. ప్రభుత్వం ఆంక్షలు విధిస్తున్నప్పటికీ, పాకిస్తాన్‌కు చెందిన ప్రముఖ నటులు అద్నాన్ సిద్ధిఖీ, అహసాన్ ఖాన్ వంటి వారు ఆశా భోస్లే మృతికి సంతాపం తెలిపారు. ఆమె గొంతు పాకిస్తాన్‌లోని ప్రతి ఇంట్లోనూ వినిపిస్తుందని, ఆమె మరణం సంగీత ప్రపంచానికి తీరని లోటని వారు కొనియాడారు.

Also Read:‘డెకాయిట్‌’..మంచి సినిమా తీశాం!

సంగీతానికి భాష, దేశం లేదని విశ్వసించే అభిమానులు, పాక్ ప్రభుత్వ తీరుపై సోషల్ మీడియాలో అసహనం వ్యక్తం చేస్తున్నారు.