ఫీజు రీయింబర్స్మెంట్ చెల్లించని కారణంగా విద్యార్థులకు సర్టిఫికెట్లు ఇవ్వకుండా వేధిస్తున్న కాలేజీలపై కఠిన చర్యలు తీసుకోవాలని తెలంగాణ హైకోర్టు స్పష్టమైన ఆదేశాలు జారీ చేసింది. ఫీజు బకాయిల పేరుతో విద్యార్థులను ఇబ్బందులకు గురిచేస్తున్న ప్రైవేట్ కాలేజీల వ్యవహారంపై పలు విద్యార్థి సంఘాలు, సామాజిక సంఘాలు హైకోర్టులో పిటిషన్లు దాఖలు చేశాయి. ఈ పిటిషన్లను విచారించిన హైకోర్టు ప్రభుత్వానికి కీలక సూచనలు చేసింది.
ఫీజు చెల్లించలేదనే కారణంతో విద్యార్థుల అసలు సర్టిఫికెట్లు నిలిపివేయడం చట్టవిరుద్ధమని పేర్కొంది. అలాంటి చర్యలకు పాల్పడుతున్న కాలేజీలపై తక్షణమే చర్యలు తీసుకోవాలని ప్రభుత్వాన్ని ఆదేశించింది. అంతేకాదు, కాలేజీల నుండి వేధింపులకు గురవుతున్న విద్యార్థులు తమ సమస్యలను నేరుగా తెలియజేసేందుకు ప్రత్యేకమైన ఫిర్యాదు వ్యవస్థను ఏర్పాటు చేయాలని సూచించింది.
ఫీజు రీయింబర్స్మెంట్ బకాయిల అంశంపై కూడా హైకోర్టు తీవ్ర అసంతృప్తి వ్యక్తం చేసింది. ఈ బకాయిల పరిస్థితి ఏంటో, ఇప్పటివరకు ఎందుకు చెల్లింపులు జరగలేదో అనే విషయాలపై రెండు వారాల్లో స్పష్టమైన వివరణ ఇవ్వాలని కాంగ్రెస్ ప్రభుత్వానికి ఆదేశాలు జారీ చేసింది. హైకోర్టు చీఫ్ జస్టిస్ అపరేష్ కుమార్ సింగ్ నేతృత్వంలోని ధర్మాసనం ఈ ఆదేశాలు ఇచ్చింది. ఈ తీర్పు లక్షలాది విద్యార్థులకు ఊరటనిచ్చేదిగా మారింది.
Also Read:హిమాలయాల్లో ‘ఆపరేషన్ పసిఫిక్’