భారత్‌ కోస్ట్‌ గార్డ్‌.. ‘సముద్ర ప్రతాప్’

భారత తీర రక్షక దళం (ఇండియన్ కోస్ట్ గార్డ్ – ICG) తొలి స్వదేశీ డిజైన్‌తో నిర్మించిన కాలుష్య నియంత్రణ నౌక ‘సముద్ర ప్రతాప్’ ను కేంద్ర రక్షణ మంత్రి రాజ్‌నాథ్ సింగ్ ప్రారంభించారు. గోవా షిప్‌యార్డ్ లిమిటెడ్ (GSL) నిర్మించిన ఈ నౌక, రెండు కాలుష్య నియంత్రణ నౌకల (PCVs)లో మొదటిది.

దక్షిణ గోవాలోని వాస్కోలో ఉన్న GSL ప్రాంగణంలో జరిగిన కార్యక్రమంలో గోవా ముఖ్యమంత్రి ప్రమోద్ సావంత్, కేంద్ర రక్షణ కార్యదర్శి రాజేష్ కుమార్ సింగ్, ఐసీజీ డైరెక్టర్ జనరల్ పరమేష్ శివమణి పాల్గొన్నారు. ‘సముద్ర ప్రతాప్’ కమిషనింగ్ భారత నౌకా నిర్మాణం, సముద్ర సామర్థ్య అభివృద్ధిలో ఆత్మనిర్భర్త లక్ష్యానికి కీలక అడుగుగా ఐసీజీ పేర్కొంది.

ఈ సందర్భంగా రాజ్‌నాథ్ సింగ్ మాట్లాడుతూ, “సముద్ర వనరులు ఏ ఒక్క దేశానికీ చెందినవి కావు. అవి మానవాళి యొక్క సాంప్రదాయ వారసత్వం. వారసత్వం పంచుకుంటే బాధ్యత కూడా పంచుకోవాలి. అందుకే భారత్ బాధ్యతాయుత సముద్ర శక్తిగా ఎదిగింది” అన్నారు. మహిళల భాగస్వామ్యాన్ని పెంపొందించడం ప్రభుత్వ లక్ష్యమని చెబుతూ, పైలట్, ఆబ్జర్వర్, ఎయిర్ ట్రాఫిక్ కంట్రోలర్, లాజిస్టిక్స్ ఆఫీసర్ వంటి కీలక బాధ్యతల్లో మహిళా అధికారులను నియమించినందుకు కోస్ట్ గార్డ్‌ను ప్రశంసించారు. హోవర్‌క్రాఫ్ట్ ఆపరేషన్లకు కూడా మహిళలకు శిక్షణ ఇస్తున్నామని, వారు ఫ్రంట్‌లైన్ ఆపరేషన్లలోనూ కీలక పాత్ర పోషిస్తున్నారని చెప్పారు.

‘సముద్ర ప్రతాప్’ (అర్థం: సముద్ర మహిమ) దేశ సముద్ర ప్రయోజనాలను రక్షిస్తూ, సురక్షిత–శుభ్రమైన సముద్రాలను నిర్ధారించాలన్న ఐసీజీ సంకల్పానికి ప్రతీక. పూర్తిగా భారత్‌లోనే రూపకల్పన చేసి నిర్మించిన ఈ నౌకలో 60 శాతానికి పైగా స్వదేశీ భాగాలు ఉన్నాయి. 114.5 మీటర్ల పొడవు, 16.5 మీటర్ల వెడల్పుతో, గంటకు 22 నాట్స్‌కు పైగా వేగం సాధించగలదు.

సుమారు 4,200 టన్నుల బరువు గల ఈ నౌకకు రెండు 7,500 కిలోవాట్ల డీజిల్ ఇంజిన్లు, స్వదేశీగా అభివృద్ధి చేసిన కంట్రోలబుల్ పిచ్ ప్రొపెల్లర్లు (CPP), గియర్‌బాక్సులు ఉన్నాయి. ఇవి మెరుగైన మానీవరబిలిటీతో పాటు 6,000 నాటికల్ మైళ్ల ఎండ్యూరెన్స్ అందిస్తాయి. సముద్ర కాలుష్య ప్రతిస్పందన ప్రధాన బాధ్యతగా, సైడ్-స్వీపింగ్ ఆర్మ్స్, ఫ్లోటింగ్ బూమ్స్, హై-కెపాసిటీ స్కిమ్మర్లు, పోర్టబుల్ బార్జ్‌లు, కాలుష్య నియంత్రణ ల్యాబ్ వంటి అత్యాధునిక సదుపాయాలు ఉన్నాయి. ఫైర్-ఫైటింగ్ కోసం Fi-Fi క్లాస్ 1 సిస్టమ్, అలాగే డైనమిక్ పొజిషనింగ్ (DP), ఇంటిగ్రేటెడ్ బ్రిడ్జ్ సిస్టమ్ (IBS), ఇంటిగ్రేటెడ్ ప్లాట్‌ఫామ్ మేనేజ్‌మెంట్ సిస్టమ్ (IPMS), ఆటోమేటెడ్ పవర్ మేనేజ్‌మెంట్ సిస్టమ్ (APMS) ఉన్నాయి. ఆయుధాల్లో 30 మి.మీ. CRN-91 గన్, రెండు 12.7 మి.మీ. స్టేబిలైజ్డ్ రిమోట్ కంట్రోల్డ్ గన్స్ (SRCG) ఉన్నాయి.

Also Read:మోడీ అంటే ఇష్టం అంటూనే..భారత్‌కు ట్రంప్ హెచ్చరిక!