ఎన్డీయే మంత్రులు, ఎంపీలు, ఎమ్మెల్యేలు, ఎమ్మెల్సీలతో సీఎం చంద్రబాబు టెలీకాన్ఫరెన్స్ నిర్వహించారు. ఈ సమావేశంలో ప్రస్తుత రాజకీయ పరిస్థితులు, రాబోయే కార్యక్రమాలు, ప్రభుత్వ పాలనపై చేపట్టాల్సిన చర్యలు వంటి పలు అంశాలపై విస్తృతంగా చర్చించారు. ముఖ్యంగా ఈ నెల 11వ తేదీ నుంచి 25వ తేదీ వరకు దేశవ్యాప్తంగా నిర్వహించబోయే “అటల్ సందేశ్ – మోదీ సుపరిపాలన” యాత్రలో తప్పనిసరిగా పాల్గొనాలని ఆయా నాయకులకు పిలుపునిచ్చారు.
ఈ యాత్ర భారతదేశ అభివృద్ధి పథంలో కీలక పాత్ర పోషించిన మాజీ ప్రధాని అటల్ బిహారీ వాజ్పేయి గారి స్ఫూర్తిని యువతలో నింపడమే లక్ష్యంగా జరుగుతున్నదని చంద్రబాబు గుర్తుచేశారు. వాజ్పేయి చూపిన సమగ్ర అభివృద్ధి దారిని, ప్రజలపట్ల ఆయన చూపిన అంకితభావాన్ని కొత్త తరాలకు చేరవేయడం అత్యవసరమని ఆయన పేర్కొన్నారు.
అటల్ సందేశ్ – మోదీ సుపరిపాలన యాత్రను ఆవిష్కరించిన బీజేపీ కార్యవర్గానికి సీఎం చంద్రబాబు అభినందనలు తెలిపారు. మంచి పాలన, పారదర్శకత, అభివృద్ధి, సాంకేతిక పురోగతి వంటి అంశాలలో ప్రధాని మోదీ తీసుకువచ్చిన మార్పులను ప్రజలకు వివరించే మంచి అవకాశం ఈ యాత్ర అని ఆయన అన్నారు.
ప్రతి ప్రాంతంలో సమన్వయంతో పనిచేసి యాత్రను విజయవంతం చేయాలని సూచించిన చంద్రబాబు, ప్రజలు నేరుగా ప్రభుత్వ కార్యక్రమాలు, సంక్షేమ పథకాల ప్రయోజనాలను అర్థం చేసుకునేలా నాయకులు చురుకుగా పాల్గొనాలని ప్రోత్సహించారు.
Also Read:అమెరికా పర్యటనలో లోకేష్ బిజీ బిజీ..