ఇంకో అవకాశం ఇవ్వండి..నితీశ్ విజ్ఞప్తి

బీహార్ ముఖ్యమంత్రి మరియు జేడీయూ (జనతా దళ్ యునైటెడ్) నాయకుడు నితీశ్ కుమార్ రాబోయే అసెంబ్లీ ఎన్నికల ముందు ప్రజలను ఉద్దేశించి కీలక సందేశం ఇచ్చారు. మాకు ఇంకో అవకాశం ఇవ్వండి అని ఆయన విజ్ఞప్తి చేశారు. రాష్ట్ర అభివృద్ధి సాధ్యమవ్వాలంటే ఎన్డీఏ (జాతీయ ప్రజాతంత్ర కూటమి) గెలవడం అవసరమని ఆయన పిలుపునిచ్చారు.

నితీశ్ కుమార్ మాట్లాడుతూ…తన పాలనలో బీహార్ అభివృద్ధి వేగం గణనీయంగా పెరిగిందని పేర్కొన్నారు. ఈసారి అసెంబ్లీ ఎన్నికల్లో ఎన్డీఏ అభ్యర్థులను గెలిపించండి. మాకు మరో అవకాశం ఇవ్వండి. తరువాత బీహార్‌ను దేశంలో అగ్ర రాష్ట్రాల జాబితాలో చేర్చేలా మరింత అభివృద్ధి చేస్తాం అని అన్నారు.

బీహార్ అసెంబ్లీ ఎన్నికలు రెండు దశల్లో జరగనున్నాయి — నవంబర్ 6 మరియు 11 తేదీల్లో ఓటింగ్ జరుగుతుంది. ఫలితాలు నవంబర్ 14న ప్రకటించబడతాయి. నితీశ్ కుమార్ తన సందేశంలో ఆర్జేడీ (రాష్ట్రీయ జనతా దళ్) పై విమర్శలు కూడా చేశారు. “2005లో నేను ముఖ్యమంత్రిగా బాధ్యతలు చేపట్టినప్పుడు బీహార్ పరిస్థితి చాలా దారుణంగా ఉండేది. ఆ సమయంలో ‘బీహారీ’ అని పిలవడం అవమానంగా భావించేవారు,” అని చెప్పారు. “అయితే నేను రాష్ట్ర అభివృద్ధి కోసం రాత్రింబవళ్లు నిజాయితీగా, కష్టపడి పనిచేశాను,” అని ఆయన పేర్కొన్నారు.

తన ప్రభుత్వం విద్య, వైద్యం, మౌలిక సదుపాయాలు మరియు యువత ఉపాధి అవకాశాల విషయంలో విస్తృతంగా పనిచేసిందని నితీశ్ కుమార్ తెలిపారు. దళితులు, వెనుకబడిన వర్గాలు సహా సమాజంలోని ప్రతి వర్గం కోసం పనిచేశాం. ఇప్పుడు ‘బీహారీ’ అని పిలవడం అవమానం కాదు, గౌరవం అని ఆయన అన్నారు.

Also Read:ప్రశాంత్ కిషోర్..సంచలన కామెంట్