రేణూదేశాయికి ప్రశ్నల మీద ప్రశ్నలు..ఆ ప్రశ్నలకు రేణూ ఎలాంటి సమాధానం చెప్పాలో కన్ఫ్యూజన్‌లో ఉండిపోయింది. ఎప్పుడు చూసినా..తనని ఆ ప్రశ్నలే వెంటాడుతున్నాయి.
ఇంతకీ ఆ ప్రశ్నలేంటి ? ఎవరు రేణూని ప్రశ్నిస్తున్నారనేగా మీ డౌట్‌? రేణూని కన్ఫ్యూజన్‌లో పడేసేంతగా ప్రశ్నలడుగుతోంది ఎవరో కాదు పవన్‌ ఫ్యాన్సే.
అవును.. పవన్‌కల్యాణ్‌తో విడిపోయినప్పటి నుంచి తన వ్యక్తిగత జీవితం గురించి అభిమానులు అడిగే ప్రశ్నలకు రేణూదేశాయి పలు ఇంటర్వ్యూలు, ఫేస్‌బుక్‌, ట్విట్టర్‌ వేదికగా ఎన్నోసార్లు వివరణ ఇచ్చారు.
ఘాటైన సమాధానాలూ చెప్పారు. అయినప్పటికీ సోషల్ మీడియాలో రేణూ వ్యక్తిగత జీవితం గురించి ప్రశ్నల వర్షం కురుస్తూనే ఉంది. అందుకే రేణూ మరోసారి తనదైన స్టైల్‌ లో ఫ్యాన్స్‌కి జవాబు ఇచ్చేసింది.
అందరికీ నమస్కారం..
నాలుగేళ్ళుగా ఫేస్ బుక్, ట్విటర్ లాంటి సోషల్ మీడియాలో నా వ్యక్తిగత జీవితానికి సంబంధించి వరసగా అభ్యర్ధనలు, విన్నపాలు ఎడతెరిపి లేకుండా కురుస్తూనే వున్నాయి. నేను నా ఇంటర్వ్యూలలో, సోషల్ మీడియాలో ఎన్ని సార్లు వివరణ ఇచ్చినా ఇవి ఆగడం లేదు. అందుకే మరొకసారి చాలా స్పష్టంగా నా అభిప్రాయాన్ని చెప్పడానికి ఈ క్రింది పోస్టు పెడుతున్నాను అంటూ తన ఫేస్ బుక్ పేజీలో ఇలా చెప్పుకొచ్చింది.
”మిత్రులు..నా శ్రేయోభిలాషులు అందరికీ నమస్కారం.
మీరు నిరంతరం నా పట్ల చూపిస్తున్న ప్రేమాభిమానాలకు, నాకు అందిస్తున్న సహాయ సహకారాలకు నా హృదయపూర్వక కృతజ్ఞతలు తెలియజేసుకుంటున్నాను. నా వ్యక్తిగత జీవితం గురించి మీ అందరికీ ఒక విజ్ఞప్తి చేయాలనుకుంటున్నాను.
కళ్యాణ్ గారు నాలుగేళ్ళ క్రితం “ఆనా” ను పెళ్ళిచేసుకున్నారు. వారికి ఒక చక్కటి కూతురు కూడా ఉంది. ఆయన వివాహ బంధాన్ని..ఆయన కుమార్తెకు జన్మనిచ్చిన తల్లిని గౌరవిస్తూ నేను మీకు చేసుకునే విన్నపం ఒక్కటే. నేను, కళ్యాణ్ గారు తిరిగి ఏకం కావాలని మీరు పదేపదే కోరవద్దు. దయచేసి ఒక విషయం మీరంతా అర్థం చేసుకొని ఆమోదించాలి. అదేమిటంటే కళ్యాణ్ గారి భార్య ఆనా. నేను కాదు.
ఒకటి మాత్రం నిజం. ఆయన నా పిల్లలకు తండ్రి. నేనూ ఆయన మంచి స్నేహితులం మాత్రమే. కాని మేమెప్పటికీ తిరిగి భార్యాభర్తలం కాలేము. ఈ సత్యాన్ని నేను మనసా వాచా కర్మణా అంగీకరిస్తున్నాను. మీరు కూడా ఈ వాస్తవాన్ని అర్థం చేసుకుంటారని ఆశిస్తున్నాను. నన్ను తిరిగి కళ్యాణ్ దగ్గరికి వెళ్ళమని మాటిమాటికీ మీరు కోరడం సబబు కాదని గుర్తించాల్సిందిగా మనవి చేస్తున్నాను. మరో వైవాహిక బంధంలో ఉన్న ఆయన దగ్గరకు తిరిగి వెళ్ళడం అసమంజసం, అసాధ్యం, అర్థరహితం అని మీ అందరికీ తెలియజేస్తున్నాను.
భవిష్యత్తులో ఈ విషయమై ఎలాంటి ఇబ్బందులూ కలిగించే ఒత్తిడితో కూడిన కోరికలేవీ మీ వద్ద నుండి ఎదురుకావని ఆశిస్తున్నాను. ఎంతో నిజాయితీతో మనస్పూర్తిగా మీకు నేను చేసిన ఈ విన్నపాన్ని సహృదయంతో అర్థం చేసుకుంటారని, ఎప్పటిలా మీ నిర్మలమైన స్నేహ వాత్సల్యాలను అందిస్తారని కోరుకుంటున్నా”.అని రేణూదేశాయి తన మనసులోని మాటని చెప్పేసింది. మొత్తానికి రేణూ ఇంతచెప్పినా..ఇప్పటికైనా పవన్‌ ఫ్యాన్స్‌ రేణూని ప్రశ్నలు అడగడం మానేస్తారో లేదో చూడాలి మరి.
