విశ్వరూపం’ సినిమా సృష్టించిన సంచలనం గురించి తెలిసిందే. దాంతో ఆ సినిమాకి సీక్వెల్ గా ‘విశ్వరూపం 2’ ను కమల్ తెరకెక్కించారు. అత్యంత భారీ బడ్జెట్ తో విలక్షణ నటుడు కమల్ హాసన్ నట విశ్వరూపం చూపించిన సినిమా విశ్వరూపం. ఈ సినిమా సీక్వెల్ ని దాదాపుగా పూర్తి చేశాడు. అయితే కొన్ని కారణాల వలన ఈ సినిమా ఆగిపోయింది.
తొలిభాగాన్ని మించిన స్థాయిలో ఈ చిత్రం తెరకెక్కిందని ఈ సినిమా కోసం కమల్ ఎంతో కష్టపడ్డారని తెలుస్తోంది. అయితే నాలుగేళ్లుగా నానా తంటాలు పడుతున్నా విశ్వరూపం2 మాత్రం విడుదలకు నోచుకోలేకపోయింది. ఈ సినిమాను తప్పకుండా విడుదల చేయాలనే పట్టుదలతో కమల్ చాలా ప్రయత్నాలు చేశారు. మొత్తానికి ఆయన చేసిన ప్రయత్నాలు ఫలించాయి.
అక్టోబర్లో ఈ సినిమాను విడుదల చేయనున్నారు. ఈ నేపథ్యంలో ఈ సినిమా నుంచి ఒక టీజర్ ను రిలీజ్ చేయడానికి సిద్ధమవుతున్నారు. రంజాన్ పర్వదినాన్ని పురస్కరించుకుని ఈ నెల 23న టీజర్ ను విడుదల చేయనున్నారు.రాజ్‌కమల్‌ ఫిల్మ్స్‌ ఇంటర్నేషనల్‌ పతాకంపై కమల్‌హాసన్‌ నిర్మిస్తున్న ఈ చిత్రానికి జిబ్రాన్‌ సంగీతం అందిస్తున్నారు.
కమల్ హాసన్ స్వయంగా దర్శకత్వం వహించిన ఈ సినిమాలో కమల్ తో పాటు పూజ కుమార్, ఆండ్రియా, శేఖర్ కపూర్ లు ప్రధాన పాత్రల్లో నటిస్తున్నారు. ఇప్పటికే నిర్మాణ పనులు పూర్తి చేసుకున్న ఈ సినిమాకు మిగిలి ఉన్న కొద్ది పాటి పోస్ట్ ప్రొడక్షన్ పనులు పూర్తి చేసి అక్టోబర్లో రిలీజ్ చేసేలా ప్లాన్ చేస్తున్నాడు కమల్.
