హీరో త్రిగుణ్ ప్రస్తుతం ‘కిరాయి’ అనే చిత్రంలో నటిస్తున్నాడు. సే క్రియేషన్స్, ఏఆర్ కే ఆర్ట్స్, సినీ ఫ్యాన్ విజన్, జయ పుత్ర ఫిల్మ్స్ పతాకాలపై రూపొందుతోన్న ఈ చిత్రానికి వీ.ఆర్.కే దర్శకుడు. గుంటూరు కిరాయి హత్యల నేపథ్యంలో తెరకెక్కుతోన్న పవర్‌ఫుల్ చిత్రం ఇది. అమూల్య రెడ్డి యలమూరి, నవీన్ రెడ్డి వుయ్యూరు నిర్మాతలు. బుధవారం హీరో త్రిగుణ్ పుట్టినరోజు సందర్భంగా స్టైలిష్ డైరెక్టర్ హరీష్ శంకర్ చేతుల మీదుగా చిత్ర ఫస్ట్ లుక్, టైటిల్‌ను మేకర్స్ విడుదల చేశారు.
ఈ ఫస్ట్ లుక్‌లో రస్టిక్, రగ్గడ్ లుక్‌లో త్రిగుణ్ కనిపిస్తున్నారు. ఫస్ట్ లుక్ విడుదల అనంతరం దర్శకుడు హరీష్ శంకర్ మాట్లాడుతూ.. త్రిగుణ్ నాకు చాలా కాలం నుండి తెలుసు. తను చాలా ఎనర్జిటిక్ హీరో. గతంలో లవ్, కామెడీ వంటి మంచి మంచి సినిమాలు చేశాడు. ఈ చిత్ర ఫస్ట్ లుక్ చూశాను చాలా బాగుంది. తను మొదటిసారిగా డిఫరెంట్ సబ్జెక్ట్‌తో ప్రేక్షకుల ముందుకు వస్తున్నాడు. ప్రేక్షకులు ఈ చిత్రాన్ని ఆదరించాలని మనస్ఫూర్తిగా కోరుతున్నాను అన్నారు.
