ఎన్టీఆర్ జీవిత బయోపిక్ మూవీపై మరో వార్త ఫిల్మ్‌నగర్‌లో హల్‌చల్ చేస్తోంది. త్వరలో ఎన్టీఆర్ జీవిత చరిత్రను తెరమీదకు తీసుకువస్తానని ప్రకటించగానే టీ టౌన్‌లో ఇదే హాట్ టాపిక్‌గా మారింది. ఇక ఈ మూవీలో ఎన్టీఆర్ పాత్రను తానే పోషిస్తానని బాలకృష్ణ ప్రకటించిన సంగతి తెలిసిందే. ఇక ఈ మూవీలో ఏఎన్నార్‌కు ఓ ప్రధాన పాత్ర ఉంది. ఇద్దరూ ఎన్నో చిత్రాల్లో కలిసి నటించారు. పోటాపోటీగా ఇద్దరూ సినిమాలు చేసినా.. నిజజీవితంలో ఎంతో సన్నిహితంగా ఉండేవారు. చెప్పాలంటే ఎన్టీఆర్, ఏఎన్నార్‌లు ఎంతో ఆప్యాయంగా ఉండే మిత్రులు.
అందుకే ఎన్టీఆర్ బయోపిక్ అంటే.. అందులో కచ్చితంగా ఏఎన్నార్ ఉండాల్సిందేనని, ఏఎన్నార్ లేని ఎన్టీఆర్ బయోపిక్ అసాధ్యమని టాలీవుడ్ వర్గాలు చర్చించుకుంటున్నాయి. దీంతో ఒకవేళ సినిమాలో ఏఎన్నార్ పాత్రను జోడిస్తే.. ఆ పాత్రను పోషించేది ఎవరు అన్న ప్రశ్నలు వేస్తున్నారు ఫిల్మ్‌నగర్ వర్గాలు. ఇంకెవరు.. ఎన్టీఆర్ పాత్రను బాలయ్య పోషిస్తున్నాడు కాబట్టి ఏఎన్నార్ పాత్రను ఆయన వారసుడు అక్కినేని నాగార్జున పోషిస్తేనే బాగుంటుందని అంటున్నారట. వాళ్లిద్దరూ కలిసి నటిస్తే ఇండస్ట్రీలోని రెండు ప్రముఖ కుటుంబాల నుంచి మరోసారి మల్టీస్టారర్ సినిమా రావడం తథ్యమని వారు చర్చించుకుంటున్నారట. మరి, ఏఎన్నార్ పాత్ర పోషించేందుకు నాగార్జునకు అవకాశం వస్తే.. ఒకే చెబుతాడా? లేదా అన్నది వేచి చూడాల్సిందే.
