యాంకర్‌ సుమ తన మాటలతో, విసిరే పంచ్‌లతో తెలుగు ప్రేక్షకుల్లో మంచి గుర్తింపును సంపాదించుకుని టాప్‌ యాంకర్‌గా కొనసాగుతున్నారు. యాంకరింగ్‌కే వన్నె తెచ్చిన సుమను తమ ప్రొగ్రాముల్లో యాంకర్‌గా తీసుకోవడానికి ఎన్నో ఛానెళ్లు ఆసక్తిని చూపుతుంటాయి. యాంకరింగ్‌ ప్రస్థానంలో ఎన్నో ప్రేక్షకాదరణ పొందిన కార్యక్రమాలకు యాంకర్‌ గా చేసిన సుమ కేరీయర్‌లో అత్యంత ప్రజాదరణ పొంది ముఖ్యంగా తెలుగింటి మహిళల గుండెల్లో చిరస్థాయిగా ఎప్పటికీ నిలిచిపోయే షో స్టార్ మహిళ.
గత 12 సంవత్సరాలుగా నిర్విరామంగా కొనసాగుతున్న స్టార్ మహిళ ప్రయాణం ఇక ముగియనుంది. ప్రముఖ టెలివిజన్‌ ఈ టీవీలో ప్రతి రోజు మధ్యాహ్నం 1 గంటకు ప్రసారమవుతూ ఎంతో మంది మహిళలు, పిల్లలు, వృద్ధులు, వయసు భేదం లేకుండా అన్ని వయసుల వారిని అలరిస్తూ విజయవంతంగా కొనసాగిన ఈ కార్యక్రమానికి త్వరలో పుల్‌స్టాప్‌ పడనుంది. ఈ షో ప్లేస్‌లో వేరే కార్యక్రమాలు రానుండడంతో ఈ షోకు తాత్కాలికంగా విరామం పడనుంది. ఈ విషయాన్ని ఆ షోకు వ్యాఖ్యాతగా వ్యవహరిస్తున్న సుమనే తన ఫేస్‌ బుక్‌ ఖాతాలో వివరించింది.
ఈ సందర్భంగా సుమ మాట్లాడుతూ త్వరలో ఘనంగా ఫినాలే ఎపిసోడ్‌ను ప్రసారం చేయబోతున్నాం. మీరు నాకు, స్టార్ మహిళకు వీరాభిమానులైతే, నేనంటే మీకు అభిమానముంటే మీరు ఒక చిన్న పని చేయండి. మీకు నేనంటే ఎంత ఇష్టమో, స్టార్ మహిళ కార్యక్రమం అంటే ఎంత ఇష్టమో వివరిస్తూ ఓ సెల్ఫీ వీడియో తీసుకోండి. వాటిలో బెస్ట్‌ వీడియోలను ఎంపిక చేసి ఫినాలే ఎపిసోడ్‌లో ప్రసారం చేస్తాం. చిన్నాపెద్దా అన్న తేడాలేకుండా ప్రతిఒక్కరూ ‘స్టార్ మహిళ’ కార్యక్రమాన్ని ఆదరించారు. వారందరి ప్రేమను, స్టార్ మహిళ ప్రోగ్రామ్‌ను ఎప్పటికీ నా గుండెల్లో దాచుకుంటాను’ అని వెల్లడిస్తూ వీడియో పోస్ట్‌ చేశారు సుమ. గత 12 ఏళ్లుగా నిరంతరంగా కొనసాగుతున్న స్టార్ మహిళ ప్రోగ్రాం ఇకపై ప్రసారం కాదని తెలిసిన స్టార్ మహిళ ప్రేక్షకులు, యాంకర్‌ సుమ అభిమానులు ఒకింత నిరాశకు గురవుతున్నారు. సుమక్క వ్యాఖ్యాతంగా వ్యవహరించిన మన స్టార్ మహిళ షో త్వరలోనే తిరిగి ప్రసారం కావాలని మనమూ కోరుకుందాం.
