డిజిటల్ యుగంలో పెరుగుతున్న సైబర్ దాడులను సమర్థంగా ఎదుర్కొవాలంటే భారత్ మరింత పటిష్ఠమైన సాఫ్ట్వేర్, హార్డ్వేర్ వ్యవస్థలను అభివృద్ధి చేయాల్సిన అవసరం ఉందని కేంద్ర ఎలక్ట్రానిక్స్ మరియు సమాచార సాంకేతిక శాఖ (MeitY) కార్యదర్శి ఎస్. కృష్ణన్ పేర్కొన్నారు. సాంకేతిక రంగంలో స్వావలంబనతో పాటు భద్రతకు అత్యధిక ప్రాధాన్యం ఇవ్వాలని ఆయన సూచించారు.
ప్రస్తుతం ప్రభుత్వ సేవలు, బ్యాంకింగ్, ఆరోగ్య సేవలు, విద్యుత్, రవాణా, టెలికమ్యూనికేషన్ వంటి కీలక రంగాలన్నీ డిజిటల్ వ్యవస్థలపై ఆధారపడుతున్నాయని ఆయన తెలిపారు. ఇలాంటి పరిస్థితుల్లో సైబర్ దాడులు దేశ ఆర్థిక వ్యవస్థ, ప్రజా సేవలపై తీవ్ర ప్రభావం చూపే అవకాశం ఉందని హెచ్చరించారు. అందుకే భద్రతను దృష్టిలో ఉంచుకుని సాంకేతిక వ్యవస్థలను రూపొందించాల్సిన అవసరం ఉందన్నారు.
కొత్త డిజిటల్ సేవలు, సాఫ్ట్వేర్లు, ఎలక్ట్రానిక్ పరికరాలను రూపొందించే దశ నుంచే భద్రతా ప్రమాణాలను అమలు చేయాలని ఎస్. కృష్ణన్ సూచించారు. సమస్యలు వచ్చిన తర్వాత పరిష్కరించే విధానం కంటే, ముందుగానే భద్రతను వ్యవస్థలో భాగం చేయడం అత్యంత అవసరమని చెప్పారు.
హార్డ్వేర్ తయారీలో విదేశీ దిగుమతులపై అధికంగా ఆధారపడకుండా, దేశీయ తయారీని ప్రోత్సహించాలని ఆయన అభిప్రాయపడ్డారు. స్వదేశీ సాంకేతికత అభివృద్ధి చెందితే సరఫరా గొలుసు భద్రత మెరుగుపడటంతో పాటు జాతీయ భద్రత కూడా బలపడుతుందని పేర్కొన్నారు.
సైబర్ భద్రత కేవలం ప్రభుత్వ బాధ్యత మాత్రమే కాదని, ప్రైవేట్ సంస్థలు, పరిశ్రమలు, సాంకేతిక నిపుణులు కలిసి పనిచేయాల్సిన అవసరం ఉందని ఆయన అన్నారు. ఆధునిక సైబర్ ముప్పులను ఎదుర్కోవాలంటే నిరంతర అప్రమత్తత, తాజా సాంకేతిక పరిజ్ఞానం, శిక్షణ పొందిన నిపుణుల బృందాలు అత్యవసరమని వివరించారు.