ఉద్యోగులు సాధారణంగా ఉత్పాదకత, సౌలభ్యం గురించి ఆలోచిస్తారు కానీ, మనం పని చేసే విధానం మన శరీరంపై చూపే ప్రభావం గురించి చాలా తక్కువగా పట్టించుకుంటారు. ఆఫీసులో పని చేసినా, ఇంటి నుండి చేసినా.. రెండింటిలోనూ శారీరక సమస్యలు ఉంటాయి. మీ శరీరం మీరు ఎక్కడ పని చేస్తున్నారు అనే దానికంటే, మీరు చేసే పనుల క్రమం (Patterns) పట్ల స్పందిస్తుంది అని నిపుణులు చెబుతున్నారు.
ఇంట్లో పని చేయడం సౌకర్యంగా అనిపించినప్పటికీ, సరైన అమరిక లేకపోవడం వల్ల శరీరం దెబ్బతింటుంది. సోఫాలు, డైనింగ్ టేబుళ్లు, నేలపై కూర్చోవడం వంటివి మెడ నొప్పి, వెన్నునొప్పి మరియు మణికట్టు సమస్యలకు దారితీస్తాయి. ఇంట్లో అడుగులు తక్కువగా పడతాయి. మంచం, డెస్క్, వంటింటి మధ్యే రోజంతా గడపడం వల్ల కదలికలు తగ్గిపోయి శరీరం మొద్దుబారిపోతుంది.
ఆఫీసు పనిలో ఉండే ప్రధాన సమస్య “ప్రయాణం” .నిత్యం ట్రాఫిక్లో గంటల తరబడి ప్రయాణించడం వల్ల శరీరంలో కోర్టిసోల్ (Cortisol) అనే ఒత్తిడి హార్మోన్ స్థాయిలు పెరుగుతాయి. ఇది నిద్రలేమి, రోగనిరోధక శక్తి తగ్గడం మరియు బరువు పెరగడానికి కారణమవుతుంది. ఆఫీసు వాతావరణంలో గంటల తరబడి కూర్చోవడం, ఎప్పుడూ ‘ఆన్లైన్’లో ఉండాలనే ఒత్తిడి మనస్సుపై తీవ్ర ప్రభావం చూపుతాయి.
మీరు ఇంటి వద్ద ఉన్నా, ఆఫీసులో ఉన్నా.. మీరు చేసే తప్పులు (bad posture, stress, lack of movement) ఒకటే. మీ శరీరం ఒత్తిడి ఎక్కడి నుండి వస్తుందనే దానికంటే, మీరు రోజువారీగా ఏం చేస్తున్నారు అనే దానికే ఎక్కువ ప్రతిస్పందిస్తుంది.ఎక్కడ పని చేస్తున్నామనే దానికంటే, ఎలా పని చేస్తున్నామనేది ముఖ్యం.ఇంట్లో పనిచేసేటప్పుడు సరైన కుర్చీ, టేబుల్ వాడండి. ల్యాప్టాప్ కంటి చూపుకు సమాంతరంగా ఉండేలా చూసుకోండి.
ఆఫీసులో ఉన్నా, ఇంట్లో ఉన్నా.. ప్రతి గంటకు ఒకసారి లేచి నడవండి. చిన్నపాటి స్ట్రెచింగ్ వ్యాయామాలు చేయండి.పని, విశ్రాంతి, మరియు శారీరక శ్రమ మధ్య సమతుల్యత పాటించండి. పని ప్రదేశం అనేది మీ సంస్థ నిర్ణయం కావచ్చు, కానీ పని ముగిసిన తర్వాత మీ శరీరం ఎలా ఫీలవుతోంది అనేది మీ చేతుల్లోనే ఉంది. చిన్నపాటి జాగ్రత్తలతో శరీరాన్ని ఆరోగ్యంగా ఉంచుకోవచ్చు.
Also Read:ప్రతిష్టాత్మకంగా భారత్-ఆఫ్రికా ఫోరమ్ సమ్మిట్!