బాలీవుడ్‌లో ఎందరో ప్రముఖుల జీవిత నేపధ్యంతో సినిమాలు తెరకెక్కగా అవి బాక్సాఫీస్ వద్ద మంచి విజయాన్నే సాధించాయి. అయితే తాజాగా బాలీవుడ్ స్టార్ హీరో సంజయ్ దత్ జీవిత నేపధ్యంతో ఓ సినిమాను తెరకెక్కించేందుకు రాజ్ కుమార్ హిరాణీ ప్రయత్నాలు చేస్తున్నారు. మున్నాబాయ్ ఎమ్ బిబియస్, 3 ఇడియట్స్, పికె లాంటి సినిమాలతో జాతీయ స్థాయిలో గుర్తింపు తెచ్చుకున్న దర్శకుడు రాజ్ కుమార్ హిరాణీ అయితేనే తన కథను సరిగా చూపిస్తాడన్న నమ్మకంతో సంజయ్ దత్ కూడా ఆ బాధ్యతను ఈ దర్శకుడికే అప్పగించాడు.
ఈ సినిమా కాస్టింగ్ విషయంలో కూడా.., రాజ్ కుమార్ హిరాణీ తన మార్క్ చూపిస్తున్నాడు. ఇప్పటికే సంజయ్ దత్ పాత్రకు యంగ్ హీరో రణబీర్ కపూర్ ను ఫైనల్ చేసిన దర్శకుడు, ఇప్పుడు సంజయ్ దత్ తండ్రి సునీల్ దత్ పాత్రకు బాలీవుడ్ సూపర్ స్టార్ ఆమిర్ ఖాన్ ను సంప్రదిస్తున్నాడు. ప్రస్తుతం దంగల్ సినిమాలో తండ్రి పాత్రలో నటిస్తున్న ఆమిర్.. ఏకంగా రణబీర్ కపూర్ లాంటి హీరోకు తండ్రిగా నటించేందుకు అంగీకరిస్తాడా..? అని బాలీవుడ్ వర్గాల్లో చర్చ నడుస్తోంది. కాగా, ప్రస్తుతానికి చర్చల దశలోనే ఉన్న ఈ సినిమా షూటింగ్ 2017 నుండి ప్రారంభం కానుందని సమాచారం.
ఇక సంజత్ దత్, రణబీర్ కపూర్, అమీర్ ఖాన్‌ల కాంబినేషన్ సెట్ అయితే మాత్రం ఇండియన్ స్క్రీన్ మీదే ఈ సినిమా సెన్సేషన్ అవుతుంది. ఈ బయోపిక్‌లో అక్రమంగా ఆయుధాలు కలిగి ఉండడం వలన జైలుకి వెళ్ళాల్సిన పరిస్ధితులను కూడా చూపించనున్నట్టు తెలుస్తోంది. మరి రాజ్ కుమార్ హిరాణీ చేయబోయే ఈ ప్రయోగం ఎంతటి సక్సెస్‌ను సాధిస్తోందో చూడాలి మరి.
