ఊహలు గుసగుసలాడే చిత్రంతో దర్శకుడిగా కమర్షియల్ సక్సెస్‌ను దక్కించుకున్న అవసరాల శ్రీనివాస్ ద్వితీయ ప్రయత్నంగా తెరకెక్కించిన చిత్రం జ్యో అచ్యుతానంద. నిన్న రాత్రి చూసిన కథానాయిక సమంత జ్యో అచ్యుతానందకు ఫిదా అయింది. మనం చూసి ఆనందించడానికి ఇలాంటి సినిమాలు ఇంకా ఇంకా రావాలని కోరుకుంటున్నట్లు ట్వీట్ చేశారు. ‘జ్యో అచ్యుతానందని రాత్రి చూశా. ఎంత చక్కటి చిత్రం. మొత్తం చిత్ర బృందానికి అభినందనలు. మనసుతో ఆలోచించి గొప్పగా కథను రాశారు. మనం చూడడానికి ఇలాంటి సినిమాలు ఇంకా ఇంకా రావాలని కోరుకుంటున్నా. చాలా గర్వంగా ఉంది’ అని సమంత ట్వీట్ చేశారు.
ప్రముఖ దర్శకుడు రాజమౌళి, పలువురు సినీ ప్రముఖులు సోషల్‌మీడియా వేదికగా చిత్ర బృందాన్ని అభినందించారు. నారా రోహిత్‌, నాగశౌర్య, రెజీనా ఈ చిత్రంలో ప్రధాన పాత్రలు పోషించారు. కల్యాణ్‌ రమణ సంగీతం సమకూర్చారు. వారాహి చలన చిత్రం పతాకంపై సాయి కొర్రపాటి చిత్రాన్ని నిర్మించారు.
దర్శక ధీరుడు రాజమౌళి, తాజాగా జ్యో అచ్యుతానందపై సినిమాపై ప్రశంసల జల్లు కురిపించాడు.సినిమా అంతా ఆరోగ్యకరమైన హాస్యం, గుండెలకు హత్తుకునే ఎమోషన్స్ అలరిస్తాయి. ముఖ్యంగా చివరి 10 నిమిషాలు కంట తడి పెట్టిస్తోందని ట్వీట్ చేశాడు.
హీరో నందమూరి బాలకృష్ణ వారాహి చలన చిత్రం స్థాపకుడు సాయి కొర్రపాటికి అభినందనలు తెలిపారు. ‘జ్యో అచ్యుతానందతో మరో విజయం అందుకున్న సాయి కొర్రపాటికి అభినందనలు’ అంటూ బాలకృష్ణ తన ఫేస్‌బుక్‌ ఖాతాలో పోస్ట్‌ చేశారు.
