ఈ ఫొటోలు చూడగానే మొదట గుర్తొచ్చేది వాళ్ల కష్టం కాదు.. బాహుబలి సినిమా. శివగామి త్యాగం. అది సినిమా అయితే.. ఇది రియల్ స్టోరీ.
నాలుగు రోజుల నుంచి కుమార్తెకు తీవ్ర జ్వరం.. చికిత్స చేయించాలంటే కాలువ దాటాల్సిందే.. కానీ ఆ కాలువ ఇటీవలి వర్షాలతో ఉధృతంగా ప్రవహిస్తోంది. ఎలాగైనా తన ఏడాది కుమార్తెను కాపాడుకునేందుకు ఆ కాలువను సైతం ఎదిరించడానికి సిద్ధపడ్డాడు ఓ తండ్రి. సరిగ్గా బాహుబలి సినిమాలో పసికందును చేతితో పైకెత్తి ప్రవాహానికి ఎదురునిలిచిన రమ్యకృష్ణను గుర్తుకు తెచ్చే ఈ ఘటన విశాఖ జిల్లా చింతపల్లి మండలం కుడుముసారిలో మంగళవారం చోటు చేసుకుంది. కుడుముసారి గ్రామానికి చెందిన పాంగి సత్తిబాబు ఏడాది కుమార్తెకు నాలుగు రోజులైనా జ్వరం తగ్గకపోగా తీవ్రమైంది.
చిన్నారిని చికిత్స కోసం తీసుకెళ్దామంటే వారం రోజులుగా కురుస్తున్న వర్షాలతో కుడుమసారి కాలువ ఉధృతంగా ప్రవహిస్తోంది. బంధువులంతా వద్దన్నా కుమార్తెకు వైద్యం చేయించేందుకు కాలువ దాటడానికే సత్తిబాబు సిద్ధమయ్యాడు. తన బాబాయ్ సహాయం తీసుకున్నాడు.
పీకల్లోతు నీటిలో చిన్నారిని రెండు చేతులతో ఎత్తుకుని.. వాగు దాటాడు. అతి కష్టంమీద.. చాలా జాగ్రత్తగా లోతుగెడ్డ ఆస్పత్రికి తీసుకొచ్చాడు చిన్నారిని. ప్రస్తుతం పాప ఆరోగ్యంగా ఉంది. ఆస్పత్రి నుంచి తిరిగి వెళ్లేటప్పుడు పాపను నెత్తిన పెట్టుకుని మరీ వెళ్లాడు. ఈ ఫొటోలను స్థానిక ఉపాధ్యాయుడు తీశారు. కుడుముసారి పంచాయతీకి రోడ్డు మార్గం లేదు. మాములు రోజుల్లో వాగులో నీళ్లు ఉండవు. భారీ వర్షాలు, వరదల సమయంలో మాత్రమే నీళ్లు వస్తాయి. ప్రస్తుత వర్షాలకు వాగు పొంగుతుండటంతో.. సత్తెబాబు ఇలా దాటాల్సి వచ్చింది.
