‘పూర్ణక్క వస్తేనే లింగ వెళతాడు’ – ‘ఎవడు తక్కువ కాదు’ సినిమా టీజర్ లో ఉన్నది ఒక్కటే డైలాగ్. అయితే… ఆ ఒక్కటీ ప్రేక్షకుల్లో ఆసక్తి కలిగించింది. ‘నా పేరు సూర్య నా ఇల్లు ఇండియా’లో పతాక సన్నివేశాల్లో అన్వర్ పాత్రలో ప్రేక్షకులు అందర్నీ ఆకట్టుకున్న లగడపాటి విక్రమ్ సహిదేవ్, మరోసారి ‘ఎవడు తక్కువ కాదు’ టీజర్‌లో ఇంటెన్స్ యాక్టింగ్‌తో ఆకట్టుకున్నాడు. ఈ టీజర్ తాజగా విడుదల చేశారు.
‘రేసు గుర్రం’, ‘పటాస్’, ‘రుద్రమదేవి’, ‘కృష్ణమ్మ కలిపింది ఇద్దరినీ’, ‘నా పేరు సూర్య – నా ఇల్లు ఇండియా’ సినిమాల్లో బాల నటుడిగా ప్రేక్షకుల ప్రసంశలు అందుకున్న విక్రమ్ సహిదేవ్… ‘ఎవడు తక్కువ కాదు’ సినిమాలో ప్రధాన పాత్రలో నటించాడు. లగడపాటి శిరీష సమర్పణలో రామలక్ష్మి సినీ క్రియేషన్స్ పతాకంపై లగడపాటి శ్రీధర్ నిర్మిస్తున్న చిత్రమిది. ‘ఎ స్టోరీ ఆఫ్ బ్రేవ్ హార్ట్’… ఉపశీర్షిక. రఘు జయ దర్శకుడు. తాజాగా చిత్రంలో తొలి పాట ‘లైఫ్ ఈజ్ ఏ క్యాసినో’ విడుదల చేశారు. ఏప్రిల్ లో సినిమాను విడుదల చేయడానికి సన్నాహాలు చేస్తున్నారు.
