తెలంగాణ రాష్ట్రంలోని ప్రముఖ గిరిజన జాతర అయిన మేడారం మహాజాతరలో ఈసారి తొలిసారిగా వాట్సాప్ సేవలను ప్రభుత్వం అందుబాటులోకి తీసుకొచ్చింది. లక్షలాది మంది భక్తులు హాజరయ్యే ఈ మహాజాతర సందర్భంగా అవసరమైన సమాచారాన్ని వేగంగా, సులభంగా అందించడమే లక్ష్యంగా ఈ వినూత్న సేవలను ప్రారంభించారు.
భక్తులు 7658912300 నంబర్కు వాట్సాప్లో “Hi” అని మెసేజ్ పంపితే చాలు, జాతరకు సంబంధించిన పూర్తి వివరాలు వెంటనే అందుబాటులోకి వస్తాయి. ఈ వాట్సాప్ సేవల ద్వారా జాతర షెడ్యూల్, దర్శన ఏర్పాట్లు, ట్రాఫిక్ సమాచారం, రవాణా సౌకర్యాలు, పార్కింగ్ వివరాలు, భద్రతా సూచనలు, అలాగే అత్యవసర సహాయ సేవల వివరాలను తెలుసుకోవచ్చు.
ఈ నెల 28 నుంచి 31 వరకు మేడారం మహాజాతర ఘనంగా జరగనుంది. ప్రతి రెండేళ్లకోసారి జరిగే ఈ జాతరకు దేశంలోని వివిధ ప్రాంతాల నుంచి భక్తులు భారీ సంఖ్యలో తరలివస్తారు. ఈ నేపథ్యంలో రద్దీ, ట్రాఫిక్ సమస్యలను తగ్గించడంతో పాటు భక్తులకు సరైన మార్గనిర్దేశం చేయడానికి వాట్సాప్ సేవలు ఎంతో ఉపయోగపడనున్నాయి.
Also Read:‘స్వయంభూ’..విడుదల తేదీ వాయిదా!
ప్రభుత్వం చేపట్టిన ఈ డిజిటల్ చర్యతో భక్తులు ముందుగానే సమాచారాన్ని తెలుసుకొని, తమ ప్రయాణాన్ని సక్రమంగా ప్లాన్ చేసుకునే అవకాశం లభిస్తుంది. వాట్సాప్ సేవల ద్వారా మేడారం జాతరలో భక్తులు మరింత సులువుగా, ప్రశాంతంగా దర్శనం చేసుకునే వెసులుబాటు కలగనుందని అధికారులు తెలిపారు.