SIR..పారదర్శకంగా జరగాలి

తెలంగాణలో ప్రారంభం కానున్న ఓటర్ల జాబితా శుద్ధి కార్యక్రమం (SIR) అత్యంత పారదర్శకంగా, జాగ్రత్తగా జరగాలని మాజీ ఎంపీ వినోద్ కుమార్ కోరారు. మంగళవారం ఆయన బీఆర్ఎస్ నేతలతో కలిసి రాష్ట్ర ప్రధాన ఎన్నికల అధికారి (CEO) సుదర్శన్ రెడ్డిని మరియు ఇతర అధికారులను కలిశారు. ఈ సందర్భంగా ఓటర్ల జాబితాలో అక్రమాలను అరికట్టాలని కోరుతూ ఒక వినతి పత్రాన్ని సమర్పించారు.

కేంద్ర ఎన్నికల సంఘం దేశవ్యాప్తంగా ఓటర్ల జాబితాను ప్రక్షాళన చేసే కార్యక్రమాన్ని చేపట్టిందని, స్వాతంత్య్రం వచ్చినప్పటి నుంచి ఇది నిరంతరం సాగుతోందని వినోద్ కుమార్ గుర్తు చేశారు. జూన్ నెల నుంచి ఈ కార్యక్రమం ప్రారంభం కానున్న నేపథ్యంలో అధికారులు అప్రమత్తంగా ఉండాలని కోరారు. ఓటర్ల జాబితాలో కొత్త ఫోటోలు ఇవ్వాలని అధికారులు సూచిస్తున్నారని, అయితే దీనిపై గ్రామీణ ప్రాంత ప్రజల్లో సరైన అవగాహన లేదని ఆయన పేర్కొన్నారు. దీనివల్ల సాధారణ ఓటర్లు ఇబ్బంది పడకుండా చూడాలని అధికారులకు విజ్ఞప్తి చేశారు.

ఒక వ్యక్తికి రెండు చోట్ల ఓటు హక్కు ఉందా? లేదా రెండు రాష్ట్రాల్లో ఓటు ఉందా? అనే అంశాలను అధికారులు క్షుణ్ణంగా పరిశీలించాలని కోరారు. క్షేత్రస్థాయిలో ఓటరు నివాసం ఉంటున్నాడా లేదా అనేది నిర్ధారించుకున్నాకే మార్పులు చేయాలని సూచించారు. ఓటర్ల జాబితా విషయంలో అనుక్షణం అప్రమత్తంగా ఉండాలని నిన్ననే కేసీఆర్ గారు పార్టీ శ్రేణులకు దిశానిర్దేశం చేశారని వినోద్ కుమార్ తెలిపారు. కేవలం బీఎల్ఓ (BLO) లే కాకుండా, రాజకీయ పార్టీల బూత్ లెవెల్ ఏజెంట్లు (BLA) కూడా ఇందులో చురుగ్గా పాల్గొనాలని పిలుపునిచ్చారు.

కొత్తగా ఓటు హక్కు కోసం దరఖాస్తు చేసుకునే వారు ప్రభుత్వం గుర్తించిన గుర్తింపు కార్డులను సమర్పించాల్సి ఉంటుందని, ఈ ప్రక్రియలో ఎక్కడా పొరపాట్లు జరగకుండా చూడాలని అధికారులను కోరారు. ఓటర్ల జాబితా అనేది ప్రజాస్వామ్యానికి పునాది వంటిదని, జూన్ నుంచి ప్రారంభం కానున్న ఈ ప్రక్రియలో ఎలాంటి రాజకీయ జోక్యం లేకుండా, అత్యంత జాగ్రత్తగా నిర్వహించాలని వినోద్ కుమార్ డిమాండ్ చేశారు.

Also Read:తెలంగాణ డీజీపీగా సీవీ ఆనంద్